KHAWTHLIR

Aizawl district magistrate R Lalramnghaka chuan thupek chhuahin, Aizawl district chhungah ennawm atan leh pawisa inchàwina atan ar leh ran dang eng chi pawh insualtir khap a nih thu a puang. Ar insualtir chu Prevention of Cruelty to Animals Act-in ran laka nunràwnna a tih zinga mi a ni a, khap vat a nih loh chuan Covid-19 darhna hmanrua a nih theih thu tarlan a ni. Thupek hian thla hnih chhung a awh dawn a, a zâwm lote chu Indian Penal Code Section 188 hmangin hrem an ni ang.

Champhai DC Maria CT Zuali chuan Champhai district-ah electoral photo identity card (EPIC) siam danglam leh EPIC lem siam ṭhin an awm tih hriat a nih thu leh, chutiang thil ti ṭhin man chhuahte chu dan anga hrem an nih tur thu a puang. Dan bawhchhiate hrem an nih theih nan EPIC lem siam ṭhin hriate chu FIR thehlut tur leh a copy district thuneitute hnena pe turin mipuite a hriattir a ni.

Lawngtlai District Advisory Committee on Youth Programme (DACYP) chu October 29, Ningani khan an chairman Dr Andrew H Vanlaldika, bawrhsap hoin an ṭhukhawm a, hmachhawpte an thlirho. Ṭhutkhawmah hian kut themthiam thil chawikân nan leh hnam ro hlu humhalhna atana NYK hnuaia din Phawngpui Handicraft Centre kalpui zel dan tur te, taksa mamawh khawp ei tur ṭha hmuh loh vanga harsatna sutkian nana thing hrisel moringa (thing behlawi) chîn pun leh vawrh lârte leh vantlang thei huan buatsaih leh thlai chi dah khâwlna tihhlawhtlin theih dan turte sawiho a ni.

Nimin khan State Referral Hospital-ah Covid-19 vei mi paruk dah luh an ni a, anni nen hripui vei mi 65 enkawl mek an ni. SRH-ZMC Bulletin tarlan danin, mi 65 zinga panga chu ICU-ah an awm a, mi 60 chu Isolation ward-ah an awm. ICU-a awm zinga pathum chu ventilator hmantir an ni a, pahnih chu oxygen pek an ni. Ward-a awm zingah ngaihtuahawm an awm lo.