Dubai-a thil thleng chungchangah MPYCC-in agency hrem an phût; Congress ṭhalai leh police an innawr

Dubai-a Mizo tleirawlte'n harsatna an tawh chungchangah Mizoram Pradesh Youth Congress Committee (MPYCC) chuan tleirawlte thawn chhuaktute hrem an phût a, nimin khan chief minister Lalduhoma hnenah lehkha an thehlut. MPYCC mite hi Chief Minister Office (CMO)-ah an kal dawn tih an hriat avangin CMO gate bulah police-in kawng an dang a, rei vak lo innawr mah se, buaina lian tham a thleng lo.

Congress ṭhalaite chu chawhnu dar 1:30 velah pung khawmin, an thil tumte an sawi hnuah Chief Minister hmu tura kal an tum. Mahse, police lamin an remtih loh avangin rei vak lo an innawr. CM-in mi 10 luh a phal thu magistrate duty-in a sawi hnuah innawr zui loin mi 10-in CM hnenah lehkha an thehlut a ni.

MPYCC chuan, Mizo tleirawl pahnih, kum la tling lo passport lem siamsak a, Dubai-a mi awmpui tura tirtu agency chu CM Lalduhoma chenna veng Chawlhhmun mi an nih thu an sawi a, "CM-in Assembly House-ah pawh sawi pial ṭâlh a tum a, hei hi ṭha kan ti lo. Chawlhhmun mite pawh ni se, dan anga an chunga hremna lek ngei kan phût," an ti.

Dubai-a Mizo tleirawlte harsatna tawh chu Dubai-a hna thawka awm Lalchhuanzela Ralte-in February 16, 2024 khan Mizoram sorkarah a thlen tih sawiin MPYCC chuan, "Mizoram sorkarin a ngaihsak duh miah lo," an ti a; youtuber pakhatin Lalchhuanzela a kawmna aṭangin thil thleng chu Mizo mipuiin an hriat thu an sawi.

Congress ṭhalaite chuan, Mizo tleirawlte dan kalha tirtu agency-te laka dan anga hma lak a nih loh chuan an ngawih mai mai dawn loh thu an tarlang a; harsatna tawkte leh anmahni buaipuitu Lalchhuanzela hnenah zangnadawmna pe turin Mizoram sorkar an phût thu an sawi bawk.

MPYCC chuan an lehkhaah, India sorkarin a mite citizenship passport holder neite tan UAE-a housemaid-a kal hi a phal lo hrim hrim tih tarlangin, "Chuti chung chuan agency-te hian dâwt sawiin UAE leh a chhehvel Muslim ramahte hian housemaid an thawn ṭhin. Hei hi a him loh êm avang leh mi tam takin buaina an tawh avangin sorkarin hemi chungchangah hian a ranglamin hma la rawh se," an ti.

Congress ṭhalaite chuan, sorkar laipuia Ministry of Overseas Indian Affairs hnuaia Protector of Immigrants hnenah registration an ti tur a nih thu ziakin, "Registration fee Rs 25,000 niin, kum 5 valid a ni a, bank guarantee cheng nuai 50 sên a ngai bawk. Agency-te’n an thawn ṭhin hian visit visa hmangin an thawn ṭhin avangin registration tih ngaihna a awm lo," an ti a; chuvang chuan agency-te'n dan ang taka sorkarah registration an tih vek theih nan a rang lama hmalak an duh thu an tarlang.