Hna thawk tura mi thawn chhuahah kan dan neih a felhlel - Chief Minister

Dubai-a Mizo tleirawl pahnihin harsatna an tawh chungchanga Mizoram Pradesh Youth Congress Committee (MPYCC) hruaitute'n nimina lehkha an thehluhnaah chief minister Lalduhoma chuan, hna thawk tura ram páwna mi thawn chhuah chungchanga Mizoramin dan a neih chu a felhlel niin a sawi.

CM Lalduhoma chuan, Dubai-a Mizo hmeichhiate'n harsatna an tawh chu an hun hmaa thil thleng a nih thu sawiin, "A hmáwr tê kan tawng ve chauh. A bilha tho lo a ni. The Mizoram Private Placement Agencies (Regulation) Act, 2015, khatih hunlaia Home minister Pu Zira put luh kha a lo felhlel a ni," a ti.

The Mizoram Private Placement Agencies (Regulation) Act, 2015-ah chuan mi thawn chhuah theihna hmun tur chu 'Mizoram páwnah' tih tawp a nih thu sawiin Lalduhoma chuan, "Dan ang chuan khawiah pawh an thawn thei," a ti a; he dan hnuaiah hian Aizawl DC-in private placement agency 27 permit a pek thu a sawi.

Chief Minister chuan, danah Mizoram páwnah an thawn thei lo ang tih ni se harsatna a thlen a rin loh thu sawiin, "Assembly House-ah agency-te'n 100%-in an tisual bik lo tia ka sawi chhan pawh a ni. Danin a phal miau avangin an thawn chhuak. A dan a felhlel a, India ram páwnah an thawn chhuak thei lo ang tih a awm lo," a ti.

CM Lalduhoma sawi danin, India ram páwna hna thawk tur thawn chhuak tur chuan Immigration Act, 1983 hnuaia Protector of Immigrant hmangin license dil tur a ni. Hei hi Ministry of Overseas India Affairs hnuaiah a awm a, chumi hnuaiah chuan India ram aṭang pawhin mi eng emaw zat thawn chhuah an ni a, Kerala phei chu an sum lak luhna ber pakhat a ni. Protector of Immigrant hnuaia license nei thlapte'n an thawn chhuah chuan harsatna an tâwk ngai lo.

September 14, 2023 khan Dubai-a Mizo 30 man an nih chungchangah Mizoram Police-ah FIR thehluh a nih thu sawiin Duhoma chuan, "Sorkar hmasain heta ṭang hian a hre ve chauh. Kan hun hma deuh vek a ni a, January, 2024-a Dubai-a an man erawh pakhat a awm. Mizoram Police-in FIR bawhzuiin thubuai an ziak lut," a ti.

Lalduhoma chuan, Aizawl DC-in license a pek agency 27-te chhui an nih thu sawiin, "An tam tham a, chhui chhung a rei ve deuh. An thubuai neih bailable a nih miau avangin an chhuak rih. Youtube-a case an register duh lo tihte kha thu dik lo a ni. Sorkar hmasain hma a lo la daih tawh," a ti.

Prosecution ti tur Prosectior General of Immigration aṭangin prosecution sanction neih a ngai tih sawiin CM chuan, "January 25, 2024 khan dilna thehluh a ni. March 18 khan reminder thawn niin, April 15 khan thawn nawn leh a ni," a ti a, Prosectior General of Immigration lam an la ngawih thu a sawi.

Chief Minister sawi danin, Mizorama agency 27-te license chu tihtawp lailâwk (temporary) mek a ni a, a la tâwk loa an hriat avangin a nghetin (permanent) an suspend vek dawn. The Mizoram Private Placement Agencies (Regulation) Act, 2015 pawh a rang thei ang berin siamṭhat an tum.

Mizoram sorkar chuan Zoram páwna hna thawka chhuakte buaipui bik tur cell a din dawn a, din turin inpeih thawkhat a ni tawh.