Mizoram sorkara department 48-ah a nghet loa thawk mi 9,050 an awm

Mizoram sorkara department 48 hnuaiah a nghet loa thawk (co-terminus, contract leh provisional employee) mi 9,050 an awm a; PHE department-ah a nghet loa thawk 2,529 awmin an tam ber.

Mizoram sorkarin Statement on Salary & Employment Data in Government, PSUs and Aided Institutions (2024-2025) a tihchhuaha a lan danin, sorkar department 48-ah sorkar hna a nghet loa thawk - co-terminus mi 288, contract mi 309 leh provisional employee mi 8,453 an awm a, an vaiin mi 9,050 an ni.

Sorkar department 48-ah hian a nghet loa thawk zingah group C tam berin, mi 4,003 an awm a, a nghet loa thawk zawng zawng mi 9,050 aṭangin 44.23% an tling. Group A-ah mi 123 (1.36%), group B-ah mi 1,090 (12.04%) leh group D-ah mi 3,834 (42.36%) an awm bawk. Sorkar hnathawk nghet lo mi 9,050 zinga 8,453 (93.40%) chu provisional employee an ni.

A nghet loa thawk awm tamna ber Public Health Engineering (PHE) department-ah mi 2,529 an awm a, sorkar department 48 hnuaia a nghet loa thawk mi 9,050 aṭangin 27.94% a tling. PHE hnuaiah hian contract-a thawk mi 16 leh provisional employee mi 2,513 an awm.

Power & Electricity department-ah a nghet loa thawk mi 1,505 an awm a, a nghet loa thawk tamna ber dawtttu a ni. PE department hnuaiah pawh hian provisional employee mi 1,485 leh contract-a thawk mi 20 an awm. PHE leh PE department hnuaia a nghet loa thawk zingah hian group C leh D an tam ber a ni.