Tui lama harsatna sukiang turin theihtawp kan chhuah - PHE Minister

PHE minister Prof. Lalnilawma chuan nimin khan ZPM pisaa inkhawmah thu sawiin, tunlaia Mizoram hmun hrang hranga tuia harsatna sukiang turin theihtawp an chhuah thu leh ZPM sorkar tharah mipuiin beiseina an neih sàn thu a sawi.

Prof. Lalnilawma chuan, tunlaiin Mizoram hmun hrang hrangah tui harsatna a awm tih sawiin, "Harsatna sukiang turin theihtawp kan chhuah a, department lam an hah ṭhin hle. Chhun leh zan zawmin, Pathianni pawh sawi hlei thei loin rim takin hna an thawk ṭhin," a ti.

Mizoram mipui tlan lui tuite duat a ngaih thu sawiin PHE Minister chuan, "Tui hi kan nunna hnár a ni a, kan luite a thianghlim zawk nan bawlhhlawh kan sâwngbàwl danah mipuite'n hma kan sawn a ngai tak zet," a ti a; tunlaiin mi ṭhahnemngaite'n lui dungte thian faiin an hnatlang ṭhin a, bawlhhlawh paih danah mipui an fimkhur zual a ngaih thu a sawi.

Prof. Lalnilawma chuan, "ZPM sorkarah chuan kan hna a ṭha tur a ni a, kan hnathawh a ṭha tâwk lo a ni chuan mipuiin min sawisel tur a ni. Kan inenlêt ang a, kan siamṭha leh tur a ni. A ṭha zawnga insawisel hi chu mi tu pawhin kan pawm thiam vek," a ti.

Tun hnaiah ZPM party mi ṭhenkhatin hna an thawk ve tih sawiin Lalnilawma chuan, "Mi ṭhenkhatin work supervisor an ruat ti zawngte'n min sawisel a, min sawiseitute hian an lo tih dan vek a ni. A thawktu ni loin, an hnathawh hi kan en zawk tur a ni a, a ṭha lo a nih chuan kan sawisel mai tur a ni," a ti a; politics a nih avanga thu dik chanve hmanga inbeihte tawp se a duh thu sawiin, ram leh hnam tana ṭha turah inlungrual takin hna thawhhopuiah eptute a sáwm.

Prof. Lalnilawma chuan, ni tin dilna a lût reng tih sawiin, "Mamawh zawng zawng inpek vek a harsa ang, mipui náwlpuiin kan ni tin khawsakna leh kan eizawnnaa kan mamawhte a tam thei ang ber inphuhrûksak hi sorkar mawhphurhna a ni," a ti a; khawtlang hmasawnna hnate themlem taka thawh a ni ṭhin chu fel lo a tih thu a sawi.