Fûr thleng tura inpuahchahna sawiho

Lawngtlai District Disaster Management Authority chairman Cheemala Siva Gopal Reddy, bawrhsap hoin nimin khan a pisaah sorkar hotute leh khawtlang hruaitute'n kumin fûr thleng tura inpuahchahna hrang hrang an sawiho.

Cheemala Siva Gopal Reddy chuan, Mizoramah fûr ruahtui a tam ṭhin tih sawiin, "Fûrpui thleng turin khuarèl chhiatna hrang hrang a thlen theih avangin lo inrin lâwk a ṭul," a ti a; hmasawnna hna thawh hrang hrangte fûr thlen hmaa zawh a nih theih nan chak taka thawk turin work department hotute a chah.

Lawngtlai DC chuan, kawlphetha, tui, kawng, buhfai, hriselna kaihhnawih leh ni tin mamawh thil dangah fûr laia harsatna a awm lohna turin mahni zâwn ṭheuhah inpuahchah turin sorkar department-te a chah. Fûr laia leimin, kawng chhia leh chhiatna chi dang a thlen palh chuan DC office-a Disaster Control Room-ah hriattir vat turin mipui a ngen bawk.

Ṭhutkhawmah hian khuarel chhiatna thleng thei laka sorkar inpuahchahna leh ruahmannate bakah, chhiatna tuarte sorkar aṭangin chhawmdawlna leh zangnadawmnate a ṭul anga ngaihtuaha pek ṭhin a nih thute tarlan a ni. Fûr thleng turah mipuiin harsatna an tawh loh nan sorkar, VC leh tlawmngai pawlte ṭha taka thawhho ni se, an ti.