MNF-in chak theihna sang tak kan nei - Dr R Lalthangliana

MNF senior vice president Dr R Lalthangliana chuan nimin khan an party pisaa inkhawmah thu sawiin, Lok Sabha inthlanah MNF-in chak theihna sang tak an nei niin a sawi.

Dr R Lalthangliana chuan, Lok Sabha inthlan campaign-in Mizoram dung leh vângah an kal chhuak vek thei tih a sawi a, "Kan campaign tawhnaah mipuite'n min support em em a, MNF Campaign Directorate leh party worker rim taka thawktu zawng zawng leh mipui, MNF support-tu zawng zawng hnenah lawm thu ka sawi. Pathian zarah chak theihna sang tak kan nei a ni," a ti.

MNF sorkar laia an thil tih ṭhatte sawiin R Lalthangliana chuan, Mizoram State Cancer Insitute tan theihtawp a lo chhuah thu te, Japan International Corporation Agency (JICA) nen ṭanghoin Mizoram State Super Speciality Cancer & Research Center din tur an tihfel thu leh chuta tan chuan cheng vbc. 700 hu inremna ziah a nih tawh thute a sawi a ni.

AMC corporator David Zohmangaiha pawhin thu sawiin, MNF party-in ram leh hnam leh sakhua an vei nasat a ngai leh zual thu a sawi a; ram leh hnam tana an hmachhawp tihlawhtling turin theihtawp chhuah a ṭul thu te, Pathian leh Mizoram tan ke pên a, theihtawpa ṭan lak a ṭul thute a sawi bawk.