KHAWTHLIR

Veterinary Day

College of Veterinary Sciences and Animal Husbandry (CVSCAH), Central Agricultural University, Aizawl chuan April 27, 2024 khan an college-ah World Veterinary Day 2024 an hmang a, CVSCAH dean Prof. Lalnuntluangi Hmar-in a hmanpui. Day thupui chu 'Veterinarians are essential health workers' (Mihring leh ran hriselna atana veterinary doctor-te hi hna thawktu pawimawh tak an ni) tih a ni a, powerpoint presentation hmangin zirlaite inelna buatsaih a ni. Veterinary College Teacher Association bultumin a thlawnin ui a hri danna ui 57 leh zawhte pakua pek a ni bawk.

Vawk thi paih dem

YMA, Chhimphei Group chuan thuchhuah siamin, an huam chhunga Muallungthu ramah vawk thi paih a ni chu pawi an tih thu leh a titute an dem thu an tarlang a, "Chhimphei Group YMA huam chhungah hetiang hi a thleng nawn leh a nih chuan kan ngawi mai mai dawn lo a, a ṭul angin hma kan la zui nghal zel tawh dawn," an ti. Muallungthu rama vawk thi paih, April 26, 2024-a hmuh chu Muallungthu VC kaihhruaina hnuaiah phûm a nih thu an tarlang bawk.

Sikul a kâng

Nimin zing dar 7 vel khan Lungsen Middle School-II a kâng a, bungrua chuh hman lohin a kang ral. Kângmei chhuah chhan hriat chian a ni lo. Chhiatna thleng vanga zirlaite'n harsatna an tawhte a rang thei ang bera zir chiang a, zirna an chhunzawm leh vat theih nan hma la turin Lunglei MZP chuan thuneitute an ngen a ni.

Party hruaitu inruat thar

Mizoram Pradesh Congress Committee (MPCC) president Lal Thanzara chuan April 26, 2024 khan MPCC senior vice president atan vice president ni lai Lalnunmawia Chuaungo a ruat a; vice president atan C Ngunlianchunga, MLA, RL Valla, Thakthing Veng leh Ronald Sapa Tlau, Zonuamte a ruat bawk. Nimina PC party Executive Committee ṭhukhawm chuan an party vice president atan Rita Malsawmi a ruat. PC party thuchhuah chuan, Rita Malsawmi hi Lok Sabha inthlana PC party candidate a nih thu tarlangin, "Party chuan amah hi nasa taka party chawisang thei turah a ngai a ni," a ti.