Aizawla vawk vulh laklawh vangin ngaihhnathiam dilna 8,530 a lut

Aizawl Municipal Corporation (AMC) chuan Aizawl khawpuia vawk vulh khuahkhirhna a kalpui turah vawk vulh laklawh vanga ngaihhnathiam dilna AMC-ah 8,530 a lut a, dilna lutte endik mek a ni.

RTI Act tlawhchhana zawhna AMC SPIO-in a chhan danin, Aizawl khawpui veng hrang hrang aṭangin vawk vulh laklawhte'n vulh chhunzawm rih turin ngaihhnathiamna an dil a, April 25, 2024 thleng khan dilna 8,530 a lut tawh. Ngaihhnathiam dilna pawm zat, hnâwl zat leh permit pek tawh zat chungchang zawhna chu, endik mek a nih avangin an chhàn theih loh thu an tarlang.

Tarlan tawh angin, AMC huam chhungah mihring chenna in aṭanga ft. 100 huam chhungah vawk vulh khap a ni. Vawk vulh ngaihhnathiamna (exemption) hi January 2024 chhung dilna hun hawn niin, diltute vawk vulh lai leh vulhna hmunte AMC leh local council aiawhte'n an endik mek a, endikna aṭangin ngaihhnathiamna pek tlâka ngaihte hnenah permit pek a ni ang.

AMC chhungah mi dang tana hlauhawm leh hnawksak theia vawk vulhte chu Municipality Act Section 175 angin Rs 2,000 thleng chawitir theih a ni a, dan an zawm loh zel chuan ni tin Rs 200 chawi belhtir zel theih a ni.

Municipality Act Section 178 hmangin ran in nei mumal lote chu Rs 2,000 thleng pawisa chawitir theih a ni a, an siamṭhat loh chuan ni tin Rs 200 chawi belhtir theih a ni. AMC Solid Waste Management By-Law, 2019 hmangin vantlang hmuna thenfai loha ran êk a awm chuan Rs 5,000 thleng chawitir theih a ni bawk.

Vawk vulhtu zinga vulh laklawhte chu an vawk len dan azirin tihral/talh hun tur chhût a ni a, chumi hmang chuan ngaihhnathiamna pek a, permit dam hun chhung chhût tur a ni. Permit dam chhung bak chu khuahkhirhna huam chhungah vawk vulh phal a ni dawn lo.