Grape chingtute'n ualau taka wine zawrh leh mi tam zawk zawrh phaltir an duh

Champhai Grape Growers Society (CGGS) hruaitute chuan, ualau zawka grape wine zawrh an duh thu leh mi tam zawkin grape wine zuar thei se an duh thu sorkar hotute hnenah an thlen.

Vanglaini palai zawhna chhangin CGGS hruaitute chuan, chief minister Lalduhoma leh Excise & Narcotics minister Lalnghinglova Hmar te tun hnaia an hmuhnaah, ualau zawka grape wine zawrh an duh thu leh mi tam zawkin grape wine zuar thei se an duh thu an thlen tih an sawi.

CGGS hruaitute chuan, vendor license neite chauhin grape wine an zawrh chuan grape wine an siam chhuahte an lei hneh lo tih an sawi a, "Vendor hnuaiah hian sub-vendor awm se kan duh. Vendor hi chu district capital-ah deuh chauh an awm avangin thingtlang lamah an zuar thei lo," an ti.

Grape wine zuar thei an tam chuan hralh pawh a chak tur thu sawiin CGGS hruaitute chuan, "Khaw tin leh veng tinah zawrh theih ni se kan duh," an ti a, sorkarin wine zuar thei a tihpun ngei an beisei thu an sawi.

CGGS hruaitute chuan, tunah chuan vendor-te'n grape wine chu mipui hmuh theiha langsar taka an tihlan phal a nih loh thu sawiin, "Food item a nih angin ualau taka zawrh theih ni se kan duh. Tuna kan dan neih mek hi siamṭha a, chak zawka kan hralh theihna tur min ngaihtuahsak turin thuneitute kan ngen a ni," an ti.

CGGS hruaitute'n Vanglaini an hrilh danin, Chief Minister chuan ZPM sorkar hun chhung chuan grape wine hralh chung­changah harsatna an siam loh tur thu a lo hrilh.

Hetih lai hian CGGS hruaitute chuan, tunlai hian grape wine siamah harsatna an tâwk nia sawiin, "Zu zawrh khap a nih hnua sorkarin min mansak leh avang khan hun rei tak chhung kan siam tawh lo a, pawisaah harsatna kan tâwk. Bottle leh a bâwlhlo leina atan hian cheng nuai 10 chuang a ngai a, pawisa kan nei rih lo," an ti.

CGGS hruaitute chuan, grape tui an ngah thu sawiin, "A bottle leh bàwlhlo kan neih theih rih loh avangin kan siam mumal thei lo. Chutih­rual chuan a chi thar, chang­kang zawk kan siam chhuak dawn a, a hmaa kan siam tawhte aiin a man pawh tlémin a to deuh ang," an ti bawk.