Zoram mipuite'n LRS dept aṭangin rorelna ṭha hmuh an duh - LRS Minister

Land Revenue & Settlement (LRS) department chuan nimin khan Irrigation & Water Resources conference hall-ah state level meeting an buatsaih a, LRS minister B Lalchhanzova chuan, Zoram mipuite'n an department aṭangin rorelna ṭha hmuh an duh thu a sawi.

LRS Minister chuan, ram leh leilung enkawlna a fel loh chuan hmasawnna hna a kal dik theih loh thu sawiin, "LRS department-a thawkte chuan ram enkawlna hna kan thawhnaah dik leh langtlang taka kan tih a ngai. Mipui náwlpuiin an sêl rawn leh dâwr nuam lo ang hiala ngaih theiha awm reng hi department-a thawktute ṭawiawmnain thlak danglam ka duh," a ti.

Hmahruaitu nih a duh thu sawiin Lalchhanzova chuan, "Kan hna hi Pathian min pek a nih angin rawngbawlna atan hman tur a ni. Harsatna in neihte chu ka hnenah tlang tak leh tlángnél takin rawn thlen ṭhin ang che u," a ti a; a ṭul hunah chuan a khawng viau dawn tih erawh hre turin thawktute a chah.

Revenue Minister chuan, hna thawh a hmanhmawhthlak thu sawiin, "Hriat loh hlanin kum a vei mai ṭhin. Kan department hian tun kum chhungin a hawi lam hawi tur khawpa her rem tura ke kan pên a ngai. Zoram mipui hian LRS department aṭangin rorelna ṭha hmuh an duh a, min nghâk ṭhup a ni," a ti.

Minister a nih chhungin thawktu leh ruhrel din lamah hmasawna thlen tumin hma a la dawn tih sawiin Lalchhanzova chuan, "Aizawl leh district dangah ram âwl lo zawng rawh u, chu'ng chu tihhmasawn ka duh," a ti a; sorkar ram chu mi harsa zawkte leh entrepreneur-te'n eizawnna atan hmang ṭangkai se a duh thu a sawi.

B Lalchhanzova chuan, sum thil tih theihna tel loin Pathianin MLA leh minister-ah a hruai thlen thu sawiin, "Keima tan dái ka theu a, ka awhna turin thang ka kam a ni. Ka awt lo a ni lo; mahse, keiin hma ka hruai loh chuan tu nge hma hruai chuang ang le," a ti.

LRS Minister chuan, hna thawk tak tak tura official-te sáwmin, "Kan chanvo chan hi thil harsa takte chu a ni e. A sang leh hniam pawh hnathawhna hunah chuan a awm tehrêng mai. Rál kan rèl tak taknaah chuan inzah tawn tak chungin a tê ber pawhin a thu leh idea a thawh ve thei tur a ni," a ti a; ngaihsaktu leh sawisaktu nei ve lote'n an ṭawngṭaisak department an nih theih thu a sawi.

Meeting-ah hian LRS directorate-a thawkte bakah district tina officer-te an tel a; LRS secretary Dr H Lalthlangliana leh director K Vanlalṭhiana te pawhin thu an sawi a ni.