Mizoram sorkara department zingah Education-ah post ruak a tam ber
Mizoram sorkar department zingah School Education department-ah post ruak tam berin, post 5,635 a ruak. Post awm zat (sanctioned post) aṭanga chhûtin Printing & Stationary department-ah post ruak a tam ber thung a, post ruak 64.94% a awm.
Mizoram Statement on Salary & Employment Data in Government, PSUs and Aided Institutions (2024-2025)-in a tarlan danin, School Education department-ah post 12,311 a awm a, chu'ng zinga 6,676 chu hnawhkhah niin, post ruak 5,635 (45.77%) a awm. School Education department hnuaiah hian a nghet loa thawk mi 999 an awm a, contract-a thawk mi 65 leh provisional employee mi 934 an ni.
Post ruak tamna ber dawttu Home department-ah post 12,503 awmin, post 8,286 hnawh khah a ni a, post ruak 4,214 (33.73%) awmin; Home-ah hian contract-a thawk mi pathum leh provisional employee mi 82 an awm. Home hnuaia péng hrang hrang zingah Police department-ah post ruak 3,901 a awm a, Home-a post ruak awm zawng zawng 4,214 aṭangin 92.57% a tling.
Post awm zat aṭanga chhûta post ruak tamna ber chu Printing & Stationery department a ni a, post awm zat 271 zinga 95 (35.06%) hnawh khah a nih laiin, post ruak 176 (64.94%) a awm. Printing & Stationery department-ah hian provisional employee 12 an awm bawk.
Tarlan tawh angin, Mizoram sorkar department 48 hnuaia group A, B, C leh D-ah post 54,574 a awm a; permanent (sanctioned) post 24,252 zinga 15,828 (65.26%) hnawh khah niin, temporary (sanctioned) post 30,322 zinga 17,013 (56.11%) hnawh khah a ni. Post awm zawng zawng 54,574 aṭangin post ruak 21,733 (39.82%) a awm.
Sorkar department 48-ah sorkar hna a nghet loa thawk mi 9,050 an awm a, co-terminus mi 288, contract mi 309 leh provisional employee mi 8,453 an ni.
Sorkar hna post ruak 21,733 zingah hian group B post ruak 8,795 (40.47%) awmin a tam ber a, post ruak hi group C-ah 7,953 (36.59%), group D-ah 3,720 (17.12%) leh group A-ah 1,265 (5.82%) a awm bawk.