LMC huam chhunga job card nei mi 14,200 vel paih an ni dawn

Lunglei khawpui chu municipal council hnuaiah a awm tawh avangin Lunglei RD Block huam chin, LMC huam chhung bika Mahatma Gandhi National Rural Employment Guarantee Scheme (MGNREGS) hnuaia job card nei mi 14,200 vel paih an ni dawn.

Rural Development Secretary-in hriat­tirna a chhuah angin, Lunglei Municipal Council (LMC) huam chhunga job card neite tan MGNREGS hnuaia inhlawhna chu April 1, 2024 aṭang khan a tâwp.

Hetih lai hian, a tàwp nan chawlhkar hmasa lam khan job card neitu, bank-a mapping tite account-ah pawisa thun a ni a; héi hi farewell MGNREGS hlawh tia sawi niin, kumin January, February leh March thlaa hlawh, mi pakhat tan Rs 6,225 a ni. Mapping ti ve lote erawh chuan Rs 6,225 hi an dawng ve thei lo.

Mapping hi Aadhaar card leh bank account thlun zawmna a ni a, Aadhaar card nei lo leh bank account nena thlun zawm ve lote chuan pawisa an dawng ve thei lo. Hemi chungchang hi nikum khan sorkar official-te chuan vantlang inkhawmah an lo sawifiah tawh. BDO office-ah thil awm dan zawtfiahin mi eng emaw zat chu an buai hle a ni.

Lunglei RD Block-a MGNREGS job card 18,900 aṭangin LMC huam chin bikah job card 14,200 vel paih an nih tâk avang hian MGNREGS hnuaia an sum hmuh ṭhin - hlawh, material component leh administrative cost belh khawm chu a vaiin cheng vbc. 75.54 vela chhût a ni.