BJP-in zu zawrh/khap chungchangah huaisen taka kal turin sorkar an chah

BJP, Mizoram Pradesh chuan thuchhuah siamin, Mizoram Liquor (Prohibition) Act, 2019 (MLP Act) chu hman a nih chuan huaisen taka kengkawh tur leh, zu zawrh phal an duh a nih chuan huaisen takin zawrh phal law law turin ZPM kaihhruai sorkar an chah.

BJP chuan, MLP Act chu hman mek a ni nge, zu zawrh tumin zu an thlah zalen mek tih sorkar an zawt a, "Zu an zawrh duh chuan huaisen deuhin zuar law law se, MLP Act 2019 hi an hmang a nih chuan dan leh thupek huaisen takin kengkawh rawh se," an ti.

Sorkar hmasa aṭangin zu khap ni mah se, a rûka a zalenzia mipuiin an hria tih tarlangin BJP chuan, "Engtik lai pawhin zu in mi chuan duh hunah lei tur an hmu. Tun dinhmunah hian Aizawl khawpui restaurant tam takah zu an zuar tel a, hei hi sorkar hian a hre lo der em ni?" an ti a; ZPM sorkar chu tuilairapa awm mai lo a, an duhna lam zawkah huaisen taka ding tlang turin an chah a ni.

Mizoram BJP chuan, kalphung thar zuartuteah kalphung awmze nei lo an hmu fo nia sawiin, "Thla nga zet ZPM sorkar kan hmu ta a, sorkar thar hian kalphung awmze nei min hmuhtir tak tak a hun tawh. Thu ringawta kalphung tihthar hian mipui retheihna bâk a thlen lo tih hria a, mahni nihna anga huaisen taka lang chhuak ngam turin ZPM sorkar, chief minister Pu Lalduhoma kaihhruai kan ngen a ni," an ti.