Mizoramah kum tìr thla thumah TB vei mi 595 hmuh chhuah a ni
Kumin 2024-ah March thla thleng khan Mizoramah ngawr (tuberculosis) vei mi 595 hmuh chhuah a ni a, 2023 kum tìr lam thla thum chhunga hmuh chhuah aiin a tam zawk.
Nimin khan Health Services directorate conference hall-ah National TB Elimination Programme (NTEB) 1st Quarter 2024 Review Meeting neih a ni. Meeting report-a a lan danin, kumin January leh March inkarah ngawr (TB) veia rinhlelh mi 3,761 endik niin, TB vei mi 595 hmuh chhuah an ni a; January-March, 2023 chhunga hmuh chhuah zat 420 aiin 175-in an tam zawk a, kumina an tam zawkna hi 41.67% a tling.
Kumin January 1 aṭanga March 31 thlenga TB vei hmuh chhuah tamna ber Aizawl district-ah mi 433 hmuh chhuah a ni a, hmuh chhuah zawng zawng 595 aṭangin 72.77% a tling. Mamit district-ah mi panga chiah hmuh niin, hmuh chhuah tlemna ber a ni. Health department district ṭhenah district thar pathumte district hrang angin chhiar a la ni lo.
Kumin thla thum chhungin MDR-TB (Multidrug-resistant TB) vei mi 38 hmuh chhuah a ni a, TB leh HIV vei kawp mi 57 hmuh chhuah a ni bawk. TB vei zinga 5% chu an thi a, 77% chu tihdam an ni tawh. TB vei hmuh chhuah zinga 6% chuan zunthlum an nei tel a, 33% chu vaihlo ti/khawih ṭhin niin, 16% chu zu in ṭhin an ni bawk.
Review meeting hi state TB officer Dr Febiola Kharkongor-in a kaihruai a; TB vênna chungchang sawiho niin, TB Preventive Therapy lak a pawimawh thu sawi a ni.
Khâka hrik hmuh chuap TB vei chenpuite chu TB an vei leh vei loh endik vek a, TB an vei loh chuan TB vênna laktir a ngaih thu te, chuap TB vei khâka hrik hmuhte'n an chenpuite TB an kai darh mai a awlsam avangin an chenpuite'n TB vênna an lak a pawimawh thute sawi a ni.
Hetih lai hian, TB vênna la duh lo an awm nual thu te, TB vênna la turin intih luih theih ni lo mah se, TB venna damdawiin TB kai lo tura a vên avangin chuap TB vei chenpuite'n a vênna an lak ngei a pawimawh thute an sawi bawk.
TB VEI HMUH CHHUAH ZAT
(January-March, 2024)
No. District TB vei
1. Aizawl 433
2. Lunglei 34
3. Siaha 16
4. Champhai 24
5. Kolasib 46
6. Serchhip 10
7. Lawngtlai 27
8. Mamit 5