Kuminah ASF vangin vawk 336 thi; ASF vangin vawk 112 suat a ni tawh

Vawk pûl hri, African Swine Fever vangin nimin khan tlai dar 3 vel thlengin Mizoramah vawk 18 a thi a, vawk pahnih suat a ni. Kumin 2024-ah ASF vangin vawk 336 a thih tawh a, vawk 112 suat a ni tawh. Vawk thi leh suat zawng zawng chu 448 a ni.

AH&Vety department aṭanga thu dawn danin, nimina ASF vanga vawk thi 18 zingah Armed Vengah thi tam berin, 11 a thi a; Dulte khuaah vawk pali, Saitualah vawk pahnih leh Kulikawnah vawk pakhat a thi bawk. Nimin vek khan Khatla South-ah vawk pahnih suat (tihhlum) a ni.

Kumin 2024-ah nimin thleng khan ASF vangin vawk 336 a thi tawh a, vawk thi tamna ber Dulte khuaah vawk 76 a thi tawh a, a dawttu Saitualah vawk 63 a thi tawh.

Nimin thleng khan vawk 112 suat a ni tawh a, vawk suat tamna ber Vanzau khuaah 56 suat tawh niin, a dawttu Kulikawnah vawk 22 suat tawh a ni.