KHAWTHLIR

YMA-in râl dawn

Central YMA chuan YMA, Hnahthial Model Veng Branch-in Tuichâng lui an humhalh laia vènbûk sak hnatlang an neih ṭuma tuia tla hlum K Lalchhandama (34) s/o Lalthanmawia, Hnahthial Model Veng chu ràlna Rs 20,000 pek turin an rél. October 27, 2022-a YMA Rorel Inkhawmah 'YMA chêt velnaa hliampui tuar leh thi an awmin Central YMA-in ṭanpuina/ràlna pe ṭhin rawh se' tih bawhzuina a ni.

Peaceful rally huaihawt tum

Zo Re-Unification Organisation chuan India sorkarin India leh Myanmar ramri hung a tum leh, Free Movement Regime ṭhiah a tum chu Zo hnathlakte ṭhen hran tumna leh nêkchêp tumnaah an ngaih avangin an duh lo a; an duh lohzia lantir nan May 16, 2024 khian Myanmar ramri bul velah punkhawm (peaceful rally) huaihawt an tum. Rally-ah tel vek turin Mizoram mipui leh Myanmar rama Zo fate an sáwm a ni.

ZMC MBBS result

Mizoram University chuan nimin khan Zoram Medical College-a MBBS Third Professional (Part-II) Examination 2018 & 2019 Batch result a tichhuak a; exam beitu mi 93 zinga 74 an pass a, pass percentage 79.56 a ni. Mi 19 an fail thung. Exam zinga 2018 batch-te hi nikuma final year, back paper neite an ni a, 2019 batch-te hi kumina final year-te an ni.

Rakzu man

Saitual police-te chuan nimin zing khan Keifang Vengtharah ruihhlo an vâi a, Hmingtharzeli (30) d/o Vanrempuii, Keifang hnen aṭangin rakzu litre 30 an man a, thubuai an ziak lut.

Ram neitute hrilhfiah

Kolasib district-a component authority for land acquisition Melody Ngurthantluangi, additional DC chuan National Highway-306 huam chhung, Kawnpui leh Khàmráng inkara ram neitute nimin khan Kolasib-a Information & Public Relations department conference hall-ah a ko khawm a, national highway kawngpui thlúr lia siam tura ram lak tur chungchang a hrilhfiah.