Supreme Court-in insawifiah turin Mizoram sorkar leh NHIDCL a hriattir; July 24 hmain sawifiahna thehluh a ngai

Supreme Court chuan tun hnai khan Mizoram sorkar leh National Highway & Infrastructure Development Corporation Limited (NHIDCL) chu kawng siam hna thawh danah hriattirna pein, insawifiahna thehlut turin a ti.

Supreme Court chuan, Environment Forest & Climate Change (EFCC) department pawmpuina tel loa hna an thawhtir avangin Mizoram sorkar leh NHIDCL chu hriattirna a pe a ni. Supreme Court hian July 24, 2024-ah a ngaihtuah leh dawn a, chumi hma chuan Mizoram sorkar leh NHIDCL-te hian insawifiahna an thehluh a ngai dawn a ni.

Mizorama Riverine Forest Reserved leh Road Side Reserved Forest chungchanga kum 2021-a Gauhati High Court single judge bench-in hriattirna a pek namnûla forest-a puan tawh (notified) sq.km. 1,829.7-a zau tichereu leh environment law zâwm tur hmuh hmaih ang maia Mizoram sorkarin a bawhzui lo chu mak a tih thu Supreme Court chuan a tarlang.

Mizoram sorkar leh NHIDCL khingtute ukil chuan Supreme Court hnenah, Mizoram EFCC Secretary-in pawmpuina lâk ngei ngei ngai la loa forest ram chhungah hmasawnna hna thawh a phalsak niin a tarlang a, "Mizoram sorkar thil tih hian Forest Reserveation Act, 1980-in a tum, forest huam chin ṭul loa tihchhiatna laka humhim leh environment vawnhimna a kalh a ni," a ti.

Mizoram sorkar leh NHIDCL khingtute ukil sawi danin, Mizoram sorkar thil tih dan chuan Mizoram EFCC Secretary leh PCCF hoa meeting thutlukna pawh a kalh. Meeting-ah chuan, ram pumpui sq.km. 1,929.7 vel chu RRF notification hnuaia mi a ni a, forest a ni chhunzawm zel ang tiin thutlukna siam a ni.