India-Myanmar ramri khâr a ni lo; Intlawhpawhnaah harsatna a awm lo
May 1, 2024 aṭangin India/Mizoram leh Myanmar ramria inkalpawhnate khâr a ni dawn tia puanzar a nih hnuah khâr a nih dawn loh thu puanzar leh a nih angin ramri khâr a ni lo a, ram pahniha mite intlawhpawh tawnnaah harsatna a awm lo.
Vanglaini palai zawhna chhangin Zokhawthar YMA hruaitute chuan, nimin (May 1, 2024)-ah Zokhawthar leh Khawmawi inkara Ṭiau lei khâr a ni lo tih an sawi a, "Tun hma angin zalên takin kan inkalpawh thei reng a, harsatna kan nei lo. Eng chen nge zalên taka kan inkalpawh theih ang tih erawh hriat a ni lo," an ti.
Zokhawthar YMA hruaitute chuan, Zokhawtharah bungrua lut leh chhuak a awm reng tih sawiin, "Bungraw lak luh leh lak chhuahah harsatna min siam lo," an ti a; Myanmar buaina avangin tun hma angin bungraw lut leh chhuak a tam tawh loh hrim hrim thu an sawi.
Myanmar aṭanga rawn raltlante May 1, 2024 hmaa Myanmar-a kîr tura tih an nih chungchang zawhna chhangin Zokhawthar YMA hruaitute chuan, "Tunah chuan khatiang boruak a awm tawh lo. Myanmar ráltlân eng emaw zat Zokhawtharah an la awm a, kîr luihtir tumna a awm lo," an ti.
Tarlan tawh angin, Assam Rifles hotute chuan April 24, 2024 khan Tlangsam, Zote, Ngur, Ruantlang leh Hmunhmelṭha khawtlang hruaitute bakah Champhai Sub-Hqrs. YMA, Champhai South Joint VC leh Champhai North Joint VC hruaitute ko khawmin, May 1, 2024 aṭangin ramri khâr a nih dawn thu an hrilh.
Assam Rifles hotute sawi danin, April thla chung chu ngaihhnathiamna kalpui a ni ang a, ram pahnih mite darkar 72 chhung an la chám thei dawn. Mahse, April 24 aṭanga darkar 24 liam hmain Assam Rifles hotute chuan ramri khâr tumna chu sût leh a nih thu an sawi leh a ni.