CYMA-in gas tichingpen lai man

Central YMA hnuaia Kumpuan Committee member-te chuan nimin zing dar 2 vel khan Kawnpui leh Khàmráng inkarah eirawngbawlna gas tihchingpen lai nangchingin, gas bûr eng emaw zat leh gas tihchingpenna hmanruate an man bawk.

Tunlai hian eirawngbawlna gas tihchingpen a hluar chho leh tawh tih sawiin, mipuite chu gas an lakte bûk tling a nih leh nih loh finfiah nan bûktir zel turin CYMA chuan a ngen a ni.

CYMA Kumpuan Committee member-te chuan Assam aṭanga ruihhlo lo lut ṭhin nia sawite enfiahin April 30, Thawhlehni khan Cachar Young Muslim Association hruaitute an kâwm a; Vairengtea police check gate-a duty-te an kâwm bawk.

Kumpuan Committee member-te hian Assam aṭanga Mizorama ruihhlo luh dan te, tihtawp dan turte an sawipui a; Vairengte police check gate-a duty-te chu hnam dang tana temporary inner line permit (ILP) pek chhuah dan te, ILP nei lo lut rû an awm ṭhin chungchangte an sawipui a ni.

CYMA Kumpuan Committee chuan, Vairengte SDO (Civil) hnen aṭanga an hriat danin, April 2023 aṭanga March 2024 inkarah hnam dang mi 53,231 hnenah temporary ILP pek chhuah a nih thu an tarlang.