Thirsakawra India ram fan chhuah tumtu Shukla Aizawlah a rawn thleng

Join Humanity & Save Environment tih thupui hmanga environment awareness campaign tura thirsakawr hmanga India ram fan chhuah tumtu Sampoorn Shukla (RjOnRoad) chuan nimin khan Aizawl a lo thleng a; chawhnuah Khatlaa LMS bul luikawra Save the Riparians-te bawlhhlawh thenfai hnatlangah a tel.

Sampoorn Shukla chuan, India ram state hrang hrang a tlawh kualnaah khawlaiah bawlhhlawh hmuh tur a tam thu te, awareness a tam rualin mipui nunphungah a beh loh avangin a hmun loah bawlhhlawh paih a la tam nia a hriat thute a sawi.

Mizoramah pawh kawng sirah ûm ruak hmuh tur a la tam thu sawiin, lehkhathiam tam lamah Mizoram chu India rama state langsar a nih avangin Mizo mipuite chu bawlhhlawh paih kawngah fimkhur a, bawlhhlawh báwmah paih zel tura a beisei thu a sawi bawk.

Sampoorn Shukla hian Lucknow, Uttar Pradesh state aṭangin July 31, 2023 khan thirsakawr hmangin campaign a ṭan a; state 16-ah kal tawhin km. 11,746-a thui a tlân tawh a, vawiinah Tripura a pan ang.