Truck pasarihah kuhva rah man

Thawhlehni zanlai pelh hnu, nimin zing dar 1 vel khan Bilkhawthlir Kuhva Chingtu Pawl, North Chhimluang Village Council leh North Chhim­luang Branch YMA chuan truck pasarih aṭangin Myanmar aṭanga dan loa lak luh nia hriat kuhva rah an man.

Bilkhawthlir aṭanga thu dawn danin, Bilkhaw­thlir Kuhva Chingtu Pawl, North Chhim­luang VC leh YMA ṭangho chuan an thu dawn bawhzuiin Phaisen leh North Chhimluang inkarah truck pasarih lo tidingin an endik a, kuhva rah ip 130 an hmu chhuak a ni. Kuhva rahte chu an tirîral nghal.

Kuhva rah phurhna truck-te chu Yodha 4x4 vek a ni a, paruk chu Kolasib district-a register niin, pakhat chu Champhai district-a register a ni.