Khelmual puitling ngeia siam duh thu Sports Minister hnenah thlen

Lungleia Electric Veng leh Rahsi Veng khawtlang hruaitute chuan an venga football khelmual siam mek chu a len zawng leh sei zawng an beisei ang a nih loh thu leh, khelmual puitling neih ngei an duh thu Sports & Youth Services minister Lalnghinglova Hmar an hrilh.

Lungleia veng pahnih hruaitute hian April 30, Thawhlehni khan Sports Minister hi a pisaah an hmu a; ro tling turin khelmual puitling neih ngei an duh thu sawiin, "Khelmual puitling tur a nih loh chuan pawm harsa kan ti. Khelmual siam mek hi kan beisei ang a ni lo a, a lawmawm loh kan ti," an ti.

Inkawmnaah hian Mizoram State Sports Council (MSSC) lamin a hmunhma a têt deuh avanga harsatna an tawh dan te, a leng china theihtawpa zaua an siam dante leh khelmual siamnaa harsatna an tawhte leh ṭan an lak dante an sawifiah.

A hmun ngeia enho tura thutlukna siam a ni a; MSSC lamin a hmun him chin huam chhungah a zauh theih dan a la awm leh awm lohte an en ang a, khawtlang hruaitu lam pawhin rilru zau taka lo dawnsawn an tum.

Lunglei District Football Association pawhin khelmual siam mekte chu a hmunah kalin an enfiah tawh a, tihzauh an duh thu Sports Minister hnenah hian an lo thlen tawh a ni.