YMA Sub-Hqrs, Serchhipin MYC coaching centre an duh

YMA, Sub-Headquarters, Serchhip rorel inkhawm April 30, Thawhlehnia Serchhip Auditorium-a neih chuan Serchhip district-ah Mizoram Youth Commission (MYC) coaching centre din a nih theih nan hmalak an rêl.

Serchhip Sub-Hqrs. YMA rorel inkhawm hi an president Kawlṭhuama'n a kaihruai a, sorkar khawih pasarih leh YMA khawih pali an ngaihtuah. Serchhip district-ah MYC coaching centre hawn a nih theih nan Sub-Hqrs. YMA-in hma la rawh se, tih chu an pawm a ni.

Chhiahtlang-Hmuifang via Lamchhip kawng blacktop a nih theih nana hmalak te, IAS Cadre Allocation Policy 2019 AGMUT cadre-ah Mizoramin cadre hran a neih theih nan hmalak te, ráltlânte khuahkhirh zawka enkawl rawtnate an pawm a; sorkarin ruihhlo ngaite enkawlna tur home Serchhipa a din theih nana hmalak te, Serchhip Kikawn leh Lungpho kawng (jeepable road) chu changtlung zawka siam a nih theih nana hmalakte an rel bawk.

YMA hmalakna turah - ramngaw, tuihna leh nungcha humhalh kawngah chak zawka hmalak bakah, hma la ṭhate lawmman pek an rêl bawk a ni.