MIS officer tharte an inzir mek

Mizoram Information Service (MIS) 2024 batch-te chuan district hrang hrangah Information & Public Relations office-a hnathawh dan leh inrêlbàwl dante an zir dawn a, District Office Orientation Programme hmangin nimin khan Kolasib an tlawh a, IPRO Dr Hmingthanzuala'n thil pawimawhte a hrilhfiah.

MIS officer tharte hi Kolasib DC John LT Sanga'n DC conference hall-ah a kâwm a; thiamna ṭhang zelah information rintlak lak khawm leh pek chhuah a pawimawh thu sawiin, "A hun takah a dawng turte'n information an dawn hian harsatna, buaina leh inhriatthiam lohna thleng thei a véng thei. Sorkar thâ tichak tura thawktu pawimawh leh mipui leh sorkar inkara inlaichìnna ṭha siamtu hmanraw ṭangkai in ni," a ti.

Kolasib IPRO Dr Hmingthanzuala'n MIS officer tharte chu hna hrang hrang kalpui dan te, Advertisement Rules leh documentation chungchangte a zirtir. MIS officer tharte hi hmanraw hrang hrang hman dan entir an ni a, School of Nursing, Thingdawl tlawhpui an ni bawk.

MIS officer tharte hian Lunglei leh Champhai district-te an tlawh leh dawn a ni.