Vawk lak luh khapna thupek tichhuak

Aizawl bawrhsap Nazuk Kumar chuan Aizawl district hmun ṭhenkhatah vawk hri, African Swine Fever (ASF) a lèn mek avangin vawk chungchanga khuahkhirhna thupek a tichhuak a; Aizawl district páwn lam aṭanga vawk, vawksa leh vawksa aṭanga thil siam lak luh khap a nih thu a puang.

Nazuk Kumar chuan, thupek zâwm turin Aizawl district mipui a hriattir a, thupek zâwm lote chu IPC Section 188 hmanga hrem theih an nih thu tarlangin, "Aizawl district-ah ram dang, state dang leh district dang aṭanga vawk, vawksa leh vawksa aṭanga siam eitur chi reng reng lak luh khap tlat a ni," a ti.

Vawk damlo talh leh hralh khap a nih thu tarlangin Bawrhsap chuan, "Vawk damlo chu dah hran vat tur a ni a, vawk thi reng reng thûk taka phum tur a ni," a ti a; vawk damlo leh thi a awmin AH&Vety department hotute hnenah hriattir vat tur a nih thu a tarlang bawk.

AIZAWL BAWRHSAP THUPEK

☑ Aizawl district chhung khua leh khua emaw, veng leh veng emawa vawk inlakpawh tawn tur reng rengin vawk hrisel ṭha ngei a ni tih hriatpuina AH & Vety department hnenah lak tur.

☑ Aizawl hmun ṭhenkhat, vawk hri lênna (infected area)-a puante aṭangin vawk lak luh leh lak chhuah khap a ni.

☑ AH&Vety Director aṭanga phalna neite tan ASF hri lên lohna state aṭangin vawksa aṭanga thil siam (frozen pork) lak luh phal a ni.

☑ Frozen pork la lut turte'n standard operating procedure an zâwm tur a ni a, APEDA emaw, FSSAI-in a pawmpui firm an ni bawk tur a ni.