KHAWTHLIR

Mi chhuanawmte chawimawina hlan

YMA, Republic Veng Branch chuan April 30, Thawhlehni zan khan an community hall-ah YMA kumpuan hawnna inkhawm an buatsaih a, Central YMA vice president Prof. Lalnuntluanga'n kumpuan 'Ram leh hnam humhalh' a hawng. Inkhawmah hian Republic Veng mi pali - MCS-a pakhatna Lalnunpuia Renthlei, Book of the Year 2023 ziaktu K Vanlalhmangaihi, Miss Mizoram 2024 Jennifer Lalrinzuali Renthlei, MiMSA racing-a champion Lalramdina leh Ph.D hmu thar Lalhriatpuii te chawimawina hlan a ni.

PCI Assembly

India rama Presbyterian Kohhran rorelna sang ber, PCI Bienniel General Assembly vawi 45-na chu zanin hian Chaltlang Kohhran biak-inah ṭan a ni dawn a, May 5, 2024-ah a ṭiak ang. Inkhawmpuia ngaihtuah tur zingah pastor atana hmeichhia nemngheh rawtna a tel. Presbyterian Church of India-ah hian Synod puitling 10 leh provisional synod pahnih a awm mek a ni.

Serlui B-ah khawl pakhat hmang mek

Serlui-B Hydel Project-ah tunlai hian kawlphetha siamna khawl pakhat chauh hman a ni. Serlui B-ah hian kawlphetha siam chhuahna khawl pathum a awm a, khawl pakhatin megawatt 4 zel an siam chhuak thei. Khawl pathum awm mah se, pakhat bak an hmang ngai meuh lo. Tunlaiin tui a tlem avangin khawl pakhat chauh an hmang a, kawlphetha megawatt 2.6 vel a siam chhuak thei a ni.

Hrui lak sawn tur

Vaivakawn - Luangmual Chhangurkawn inkara nikum lama leiminna hmunah tun hnaia ruahsur nasa vangin lei a che leh a, hei vang hian Aizawl bawrhsap Nazuk Kumar chuan thupek a chhuah. Sorkar hmalakna tiṭhuanawp thei thilte a awm theih avangin lei chetna bawr vela electric hrui, internet hrui leh TV hrui awm zawng zawng chu May 15 chhungin lak/dah sawn nghal tur a nih thu tarlang a ni.