Sorkarin lirthei thar lei a khap

Mizoram sorkar sum inrenchemna chi khat atan official tlemtê tih loh chu motor thar lei khap a ni. Chumi bawhzui nan chuan Council of Ministers chuan Government of Mizoram Vehicle Outsourcing Policy, 2019 an pawm.

Thu dawn danin, Government of Mizoram Vehicle Outsourcing Policy-in a tum ber chu, sorkar lirthei enkawl man leh a thar leina atana sum tihtlem a ni. Sorkar department-te bakah, board leh corporation te, autonomous district council leh state sorkarin a puih hrim hrimte chu lirthei thar lei khap a ni a; secretary leh a chung lam, VIP protocol, DC leh SP-te chu he policy hian a huam lo thung.

Motor thar lei khap a nih avang hian private motor hman a ni tawh dawn a, sorkar chuan hriattirna a chhuah tawh. Mahni motor hmantir duhte chhàn theih turin hriattirna a chhuah a, level 13 chin officer-te chu thla khatah Rs. 35,000 thleng hman phalsak niin, level 12 leh a hnuai lam chu thla khatah Rs. 30,000 thleng hman a phalsak; inhman ṭâwm dan pawh ngaihtuah a ni dawn. Sorkarin sum hmansak a phal chin hian driver-te hlawh a huam a, sorkar official-te'n lirthei an hman chhunga a chhia a nih chuan motor neituin a chawi tur a ni.