Lalrawnliana thattu nia rinhlelh man tawh

Lawngtlai Police-te chuan thuchhuah siamin, Bungtlang South tlangval A Lalrawnliana thattu nia rin mi pathum man an nih tawh thu an tarlang.

Lawngtlai Police thuchhuah tarlan dan­in, Lalrawnliana thihna chungchangah hian Janua­ry 12 khan Vasei Police Station-ah thubuai ziah­luh a ni. Tualthattu nia rin mi pathumte chu man an ni tawhin, jail-ah dah luh an ni.

Mipuite chu thu belh­chiandawl lo leh hnam leh hnam inkar a buaina chawkchhuak thei thehdarh lo tur leh misual chu hrem ngei an nih theih nan an hnuchhui tibuai thei zawnga awm lo turin Lawngtlai Police chuan mipuite an ngen.

MZP Gen. Hqrs. hruai­tute chuan Inrinni khan Bungtlang South tlawhin, Lalrawnliana chhungte an ral. MZP general secretary Lalnunmawia Pautu chuan Mizoram chhung ngeia Mizote'n hnamdang kut an tuar fo leh nunna hial an chan fo ṭhin chu an hriatthiam loh takzet thu a sawi.

Lalnunmawia chuan pawikhawihnaa mawhphurtute chungah dan anga an phu ang tawk hremna na thei ang ber pek an duh thu sawiin, "Thuneitute hmalak dan pawh MZP chuan a en zui zel dawn. Mizoram chhunga hnam dang dan loa Mizoram a lo lutte leh kawhmawhbawla Zofate pawi khawihte chu Mizoram chhunga khawsa tawh lo turin kan duh," a ti. Bru Students Asso­ciation (BSA), Gen. Hqrs, Aizawl chuan thuchhuah siamin, Lal­rawnliana rawng taka thah a ni chu an dem thu leh sorkarin a titute rang taka a man chhuak chu lawmawm an tih thu an tarlang a, Lalrawnliana thattute chu an phutawk hremna pek ngei ni se an duh. He tualthihna avanga Nghalimlui khaw mipui­te chenna in leh lo tih­chhiat a ni chu pawi an tih thu sawiin BSA chuan, "Chenna tur nei mumal lo a awm mekte hi sorkarin ngaihven zui se kan duh," an ti.