Aizawla vawksa zuarte an mangang; ASF vangin Aizawlah vawk 156 thi tawh
Vawk pùl hri, African Swine Fever (ASF) léng vangin Aizawlah vawksa a tam a, vawksa zuarte an mangang. Kuminah nimin tlai dar 3 thleng khan Aizawlah ASF vangin vawk 156 a thi tawh.
Vanglaini palaiin Aizawl khawpui hmun hrang hranga vawksa zuarte leh vawksa rêp zuarte a kawmnaah sa zuartute chuan, ASF léng mek vangin vawk talh an tam thu an sawi a, "Vawk hri la lèn lohna hmuna vawk vulhtute an hlauthâwng a, talh rual a nih chuan an talh nghal deuh zel. Hei vang hian vawksa a tam em em a, inhralh a harsat phah hle," an ti.
Aizawl Bazarpuia vawksa zuarte chuan, ASF lên hmaa ni khata vawk an sèr ṭhin zat an tihtlem tawh thu an sawi a, "Hri lên hma kha chuan ni khatah quintal khatte kan sêr zo ṭhin a, tunah chuan hmunhma nei ṭha deuh leh hri kai hlau zual deuhte'n anmahnia an sèr ve bawk avangin vawksa a tam a, kan hralh zo hlei thei lo," an ti a; vawk vulhtu tam takin sêr tura an biak pawhin a hralhnaah an buai avangin eng emaw zat an hnâr tawh thu an sawi.
Hetih lai hian, Animal Husbandry & Veterinary department chhinchhiah danin, kuminah nimin tlai dar 3 thleng khan Mizoram pumah ASF vangin vawk 403 a thi a, hri darh zel tur vên nan vawk 112 suat a ni tawh. ASF vanga vawk thi zinga 156 chu Aizawl veng pasariha mi a ni a, veng paliah vawk 29 suat a ni tawh bawk.
Vawk man a tlahniam
Aizawl veng ṭhenkhata ASF léng mek vangin vawk vulhtu tam tak chuan an vawk tihralna tur an zawng a, vawk talh duh an tam avangin vawk pum man a tlahniam nasa.
Vawk sêrtute chuan, tun hma aiin vawk man a tlahniam nasa tih sawiin, "Hri lên hmaa a len zawng azira Rs 25,000 - 30,000 vela kan lâk ṭhin kha tunah chuan Rs 15,000 veltein kan la tawh," an ti a; hmun ṭhenkhatah chuan Rs 15,000 vela an lak ṭhin chu Rs 10,000 vela lak tur a awm tawh tih an sawi. Hetih lai hian, vawksa kg. khat man erawh a la danglam lo.
Vawksa an hralh séng lo
Vawksa zuar/sêrtute chuan, vawksa a tam avangin ni khata hralh zawh loh cháng an ngah tawh thu Vanglaini an hrilh a, "Tun hmaa zing dar 7-10 inkara kan hralh zawh ṭhin kha tunah chuan ni hnih/thumte kan ṭhutpui. Vawksa a tam rualin, mipui lei dan a tam phah si loh avangin hralh zawh loh kan ngah ṭhin," an ti.
Inrinni bika vawk an talh ṭhin zat an talh ngam tawh rih loh thu vawksa sêrtute chuan an sawi a; hmun ṭhenkhata vawksa zuar/sertute chuan Inrinnia vawk 3/4 an talh ṭhin laiin, tunah chuan pakhat bâk an lâk ngam rih loh thu an sawi bawk.
Frozen pork leh vawksa rêp
Sorkar thuchhuahin a tarlan danin, Aizawl district-ah AH&Vety Director aṭanga phalna neite tan ASF hri lèn lohna state aṭangin vawksa (frozen pork) lâk luh phal a ni a; chutih rualin, inkaihhruaina (standard operating procedure) an zawm a ngaih bakah, APEDA emaw, FSSAI emawin a pawmpui firm aṭanga lak tur a ni.
Vawksa rêp zuartute chuan frozen pork avangin an inhralh tlem tlem phah niin an sawi a, "Frozen hi a man a tlàwm zawk avangin vawksa rêp kan hralh theih loh phah hle. Mi tam takin vawk an talh a, an hralh sèn loh avangin rêp turin min rawn ngen nasa a, rêp turin kan la vek séng lo," an ti.
Vawksa rèp tur a tam rualin inhralh zawh a harsat thu sawiin sa rêp zuartute chuan, "Tun hma aiin kan inhralh chhe zawk. Rêp tura lo laksak vak vakin kan hralh zawh theih loh kan hlau si a, tam tak kan la ngam lo," an ti a; mahnia vawksa rêp an tam tial tial avang leh frozen pork a awm bawk avangin inhralh a harsat thu an sawi.