KHAWTHLIR

PCI Assembly tan

Presbyterian Church of India rorelna sang ber kum khat dana neih ṭhin, PCI Bienniel General Assembly vawi 45-na chu nizan khan Chaltlang Kohhran biak-inah ṭan a ni a, Pathianni zanah a ṭiak ang. Nizan khan palai lawmna inkhawm neih a ni a, vawiin leh naktuk Inrinniah rorel a ni ang. PCI-ah hian synod puitling 10 leh provisional synod pahnih an awm mek a ni.

Lehkhabu lehlin tha ber thlang

Mizo Writers Association (MWA) chuan ṭawng danga ziah lehkhabu, Mizo ṭawnga lehlin kum 2023 chhunga chhuak ṭha berah 'Notre Dame de Paris' tih lehkhabu, Lalchhuanawma Tochhawng lehlin an thlang a; May 31, 2024-a MWA Annual Meeting-ah lawmman an hlan ang.

AR-in heroin man

Assam Rifles sipaite leh Mizoram police-te chuan April 30, 2024 khan Zuangtuiah Jangkholal Khongsai (30) s/o Dougam Khongsai, Lungngil, Churachandpur, Manipur hnen aṭangin ganja kg. 8.266 an man a, Rs 8,26,600 hu a ni. Champhai Zote leh Ngúrah heroin gram 113 an man bawk.

Chetsualnaah thi

C Lalhriatzela (44) h/o Lalnunziri, Champhai Zotlang chu May 1, Nilaini tlai dar 3 vel khan Salem Veng, Aizawlah maxicab-in a delh avangin a thi. C Lalhriatzela hian a maxicab, Aizawl leh Champhai inkara tlân a khalh a, passenger-te a thlah hnuah Salem Venga a fanu chênnaah a kal a; maxicab a húng ṭha zo, a kamna tur a zawn laiin lirthei chu hnung záwngin a lìr a, let zuiin, a delh ta a ni. Salem Veng YMA-in C Lalhriatzela kuang an tum a, nimin chhun dar 11:30 khan an inah an vui a ni.

CT Scan khawl thar

North Eastern Council (NEC) aṭanga hmuh cheng nuai 180 hmanga lei CT Scan khawl, Lairam Christian Medical Centre (LCMC), Lawngtlaia bun thar chu May 1, Nilaini khan Chin Baptist Church, USA general secretary Rev. Dr Ceu Lian Thanga'n a hawng. CT Scan khawl hi February 24, 2024 khan LCMC-ah phurh thlen a ni.

MBKHP Day

Nimin May 2 kha Mizoram Baptist Kohhran Hmeichhe Pawl (MBKHP) Day vawi 86-na a ni a, Mizorama MBKHP unit-te’n kawng hrang hrangin an lawm. Kumina MBKHP Day thupui chu ‘Tho la, i Pathian ko rawh’ tih a ni. Day pual hian kohhran ṭhenkhat chuan khawlai an tifai a, ṭhenkhatin ruai nen an lawm. Kohhran tam zawk chuan biak-in leh kohhran hall-ah hun an hmang a ni.