Loan rûl duh lo mi parukte ram chhuhsak

Champhai district magistrate James Lalrinchhana thupek angin nimin khan Mizoram Rural Bank (MRB), Champhai Branch-a loan la, rùl ṭha duh lo mi parukte ram dahkham chu chhuhsak a ni.

Champhai District Magis-trate chuan, Securitisation and Reconstruction of Financial Assets and Enforcement of Security Interest Act, 2002 (SARFAESI Act) hmangin Champhaia loan rúl ṭha lo mi parukte laka dan kengkawh turin nimin khan thupek a tichhuak.

Champhai sub-divisional magistrate Dr Manesia Khaimeichho kaihhruaiin MRB hotute leh police-te'n SARFAESI Act Section 14(14)(i) tlawhchhanin loan lakna atana ram dahkhamte chu loan rulh ṭhat loh (non-performing assets) avangin lilàm turin an chhuhsak a ni.

Loan rûl ṭha lote ram dahkham SARFAESI Act hmanga chhuhsakte chu Champhai Dinthar Veng leh New Champhaia mi pahnih ve ve te, Champhai Vengthar leh Jail Vengah mi pakhat ve ve an ni.

Ram chhuhsak tak paruk hlut zawng belhkhawm chu a hniam thei ang bera chhûtin Rs 96,24,899 vel a ni a, chutih laiin, mi parukte'n loan an rulh tur belhkhawm chu Rs 97,76,895 a ni. Loan rulh ngai aiah hian an ram dahkham chhuhsakte chu bawhzui ṭulte tihfel a nih hnuah lilàm tura ruahman a ni ang.

Champhai khawpuiah hian SARFAESI Act, 2002 hmang hian District Magistrate thupekin April 5, 2024 khan in ding lai panga chu loan rulh ṭhat loh vangin chhuhsak a lo ni tawh bawk.