Mizorama cancer leh NCD natna nei zinga 30% chu vaihlo tih vanga thleng

National Health Mission (NHM) hnuaia National Tobacco Control Programme (NTCP) chuan nimin khan ATI-ah Refresher Training cum Review Meeting an nei a; Mizorama cancer vei zinga 30% leh natna inkai chhawn theih loh natna nei zinga 30% chuan vaihlo zûk leh hmuam an tih ṭhin thu tarlan a ni.

NHM mission director Dr Eric Zomawia sawi danin, natna inkai chhàwn theih loh - non communicable disease (NCD) hrang hrangte thlen theitu pui ber chu vaihlo zûk leh hmuam tih a nia; Mizorama cancer vei zinga 30% leh NCD natna nei zinga 30% chuan vaihlo zûk leh hmuam an hmang ṭhin.

Dr Eric Zomawia chuan, NTPC hmalakna hrang hrangah an la hlawhtling rih lo a nih pawhin, tih dan dangte hmanga hmalak zel a ṭangkai thu leh, vaihlo donaah chhungkua aṭanga hmalak a pawimawh thu a sawi.

Ṭhutkhawm hi NTPC state nodal officer Dr H Lianthangpuia'n a kaihruai a; NTCP hnuaia vaihlo donaah hma an sawn zel theih nan kohhran hrang hrangte nen a thawhho a pawimawh thu sawiin, thawhhopui tura hma an lak dante a sawifiah.

Review meeting-ah hian sorkar kum liam ta 2023-24 chhunga district hrang hrang hmalaknate ngaihthlak a ni a, target an neihte an khûm ṭha a, hma an laknaah an tih ṭhat thu sawi a ni. Hmalak chhoh zel dan turte an sawiho bawk.