Swachhata Green Leaf Rating inhrilhfiah

PHE department hnuaia Project Management Unit leh Tourism department ṭang dun chuan nimin khan PHE Engineer-in-Chief pisaah Aizawla hotel leh homestay neitute pualin India rama khualbûkte'n faina lama an zawm tur tehkhâwng thar, Swachhata Green Leaf Rating (SGLR) chungchang inhrilhfiahna an buatsaih.

Orientation programme on SGLR for hospitality facilities hi PHE secretary Lalhmingliani Hmar-in a kaihruai a; Mizoramin khualzin a hîp ṭan mek nia sawiin, "Kan khualzinte lakah hian kan hotel leh homestay-te hi Mizoram hmaitláng lanna a nih vangin faina lama hotel hmunhmate kan buatsaih dan leh mikhual kan thlen danin thil tam tak a hril thei," a ti a; tehkhawng (rating system) thar chuan faina lamah hmasawnna a thlen a beisei thu a sawi.

Swachhata Green Leaf Rating hi sorkar laipuia Department of Drinking Water and Sanitation leh Ministry of Tourism-in Travel for Life Campaign hnuaia hmalakna thar a ni a; khualzinte chawlh hahdamna/thlenna hmun - hotel, homestay, resort, dharmshala leh a dangte chu faina lama kaihhruainate an zawm ṭhat dan tehna a ni dawn.

Chawlhbûk tih hian pawl leh mimal enkawl a huam vek dawn a, India ram state hrang hrangte rualin Mizoramah Swachhata Green Leaf Rating kalpui tura ruahman mek a ni.