Minister hoin ruihhlo do dan tur sawiho; Hotel/restaurant-a zu chelek en zui dawn
Excise & Narcotics minister Lalnghinglova Hmar chuan nimin khan a pisaah department officer-te leh Central YMA office bearer-te ruihhlo donaa ṭan lakho dan tur a sawipui a; ruihhlo donaah YMA nen an thawhho zel a ṭul thu a sawi. Aizawla hotel/restaurant ṭhenkhata zu chelek ṭhinte en zui a ni dawn tih sawi lan a ni.
Lalnghinglova Hmar chuan, Mizoramin zu leh ruihhlo vangin a tuar nasa tawh tih sawiin, "Ruihhlo do tur hian Excise & Narcotics department (END) leh Mizorama pawl lian ber YMA chuan hma kan lak dun zel a pawimawh. Hmun hrang hrang aṭanga zu leh ruihhlo rawn lut tur dan thu-ah te, ruihhlo dap chhuahnaahte thawkho zelin, YMA bakah, sorkara department dang te, kohhran hruaitute pawh thawhpui zel an ni ang," a ti.
END commissioner Z Lalhmangaiha chuan, "Tun hnaia Burma ram buai vanga ráltlante avangin Phunchawng leh a chhehvelah zu siamna a pun belh a, Aizawl hmun hrang hranga hotel leh restaurant ṭhenkhata ualau taka zu chelek ṭhin an awm nia sawi pawh en zui a ni ang," a ti a; zu leh ruihhlo donaah CYMA leh pawl dangte END-in a thawhpui zel thei tih a sawi.
CYMA president Lalhmachhuana pawhin thu sawiin, "Zu leh ruihhlo hluar zel hi mipuiin ngaia an neih mai a hlauhawm. Chuvangin, hetianga khawsate hian hlauh an neih a ṭul. Zu leh ruihhlo laka fihlimna tur thu leh khuahkhirhna thu hi a tam thei ang ber mipui hriatah puanzar a ngai a ni," a ti.
Inkawmhonaah hian END joint commissioner Peter Zohmingthanga leh CYMA Kumpuan Committee secretary H Lalrinpuia ten an hmalaknate an sawi a; END secretary Lalramsanga Sailo pawhin thu a sawi a ni.