Hmun pahnihah kuhva rah man

Mizoram Police leh Central YMA Kumpuan Committee member-te chuan nimin zing dar 3 vel khan Seling dáiah ram dang aṭanga dan loa lak luh nia hriat kuhva rah tam tham tak an man a; Assam Rifles sipaite'n Champhai Zotlangah kuhva rah ip 148 an man bawk.

Nimin zing dar 3 vel khan Bawngkawn Police Station-a police-te leh CYMA Kumpuan Committee member-te'n Seling dáiah truck pariat aṭangin Myanmar aṭanga dan loa lak luh nia hriat kuhva rah tam tham tak an man a, truck pariat kaihruaitu escort motor pahnih leh lirthei khalhtu mi 10 an man bawk a, Seling Police Outpost-ah an hlàn. Kuhva phurtu lirtheite chu Champhai lam aṭanga kal a ni.

CYMA Kumpuan Committee hruaitute chuan, Champhai lam aṭanga dan loa kuhva rah phurtu lirtheite'n Khawzawl gate an paltlang thei tlangpui nia thu dawn a nih thu an sawi a; "Dan loa kuhva roa sumdawnna hi a rûkin kalpui reng nia a lan avangin CYMA leh police-te chuan theihtawp chhuahin an chhui zui zel dawn a, ṭawiawm zel turin mipui kan ngen," an ti.

Hetih lai hian, Assam Rifles sipaite chuan April 30, 2024 khan Champhai Zotlangah kuhva rah ip 148 an man ve bawk a ni.