Solid Waste Management Centre siama hmalak zel dan tur sawiho

Mizoram State Project Monitoring Committee chuan nimin khan Planning & Programme Implementation department committee room-ah Hualngohmun rama Solid Waste Management Centre Phase-I siama hmalak zel dan tur an sawiho.

Ṭhutkhawmah hian Solid Waste Management Centre project, Hualngohmun rama siam mek chu hlawhtling taka din a nih theihna tur leh a hman dan tur dik tak anga Aizawl khawpuiin a hman theih nan rawtna hrang hrang thawh khawma sawiho a ni.

Hualngohmuna SWMC siam mek hi Special Assistance to State Capital Expenditure (SASCE) aṭanga hmuh cheng vbc. 16.64 hmanga siam a ni a; bawlhhlawh ton 50 (ṭawih thei leh ṭawih thei lo ton 25 ve ve) dâwl zo tura siam a ni. Mizoram State Project Monitoring Committee member-te'n April 26, 2024 khan a hmunah an lo enfiah tawh.

SWMC siam meka implementing agency chu PWD niin, nodal department chu UDPA department a ni a; siam zawh hunah Aizawl Municipal Corporation-in an enkawl zui ang.

Nimina ṭhutkhawm hi Mizoram State Project Monitoring Committee vice chairman R Lal Rinawma, IRS (Rtd)-in a kaihruai a; member-te - Planning principal adviser Dr Lalrinchhana, George Lalzuia, R Lalchhanhima, Vanchhungi leh member secretary Vanlalruata Sailo-te an tel.

PWD aṭangin chief engineer Hrangthanga Zote, superintending engineer Lalrinngeta, chief architect Lalchhandami leh superintendent Lalawmpuii te an tel a; UDPA director Dr Andrew H Vanlaldika, AMC joint commissioner Lalremruata Kullai, Aizawl Smart City deputy CEO V Lalruatliana leh consultancy firm aiawhte an tel bawk.