MNF sorkar vangin SASCI sum Cheng vbc. 433 a lapse - CM : GST-ah Mizoram pakhatna a ni

Chief minister Lalduhoma chuan nimin khan CMO conference hall-ah thuthar thehdarhtute a kàwm a; MNF sorkar vangin Scheme for Special Assistance to States for Capital Investment (SASCI) sum cheng vbc. 433.36 a kîr (lapse) thu a sawi a, "Kan sorkar hnuah India ramah Goods and Services Tax (GST) dinhmun ṭha ber kan ni," a ti.

CM Lalduhoma chuan, a kaihhruai sorkar chu SASCI Part-I sum cheng vaibelchhe eng emaw zat tikîr (lapse) anga puhna a awm thu sawiin, "Mimal anga ka mawhphurhna a nih avangin sawifiah ngei ka duh. SASCI sum hi Covid-19 vanga state-te chhawmdawlna atana central-in a ruahman, loan pung awm lo, kum 50 hnua rulh tur a ni," a ti a, Part-I bâk chu a lapse theih loh thu a sawi.

Lalduhoma chuan, SASCI Part-I ah second instalment hmu turin first instalment-ah 75% hna thawh a ngaih thu sawiin, "75% thawh hman a nih loh chuan sum a lapse. SASCI sum hi central share of taxes anga insem a ni a, SASCI atana ruahman aṭangin Mizoramin 0.5% kan chang," a ti.

Mizoram tan kum 2021-22 ah cheng vbc. 200 leh kum 2021-22 ah vbc. 300 ruahman a nih thu sawiin CM Duhoma chuan, "Heng kum hnihah hi chuan an hmang ṭha thawkhat. Kum 2022-23 ah kan chan tur vbc. 400 a ni a, kan hmang ṭha hleithei ta lo. First instalment cheng vbc. 200 release a ni a, sorkarin a hmang ṭha hlei thei lo," a ti a, chuvang chuan second instalment cheng vbc. 200 a lapse tâk thu a sawi.

Chief Minister chuan, kum 2023-24 ah Mizoram chan tur chu cheng vbc. 700 a nih thu sawiin, "Cheng vbc. 466.64 release phawt a ni a, project thar anga thehluh leh a nih avangin cheng vbc. 200 chu kum hmasa lama hna zawh loh chhunzawmna atan hman a ni. A la bâng cheng vbc. 262.55 a la awm," a ti.

Cheng vbc. 262.55 chu MNF sorkarin inthlan campaign-na atan hman an tum tih sawiin CM chuan, "Constituency wise-in sum an sem zêp loin khatih laia CM pawhin a sawi a nih kha. An che tlai em em a, an muang sual," a ti a; an chêt muan avangin hna thawh tur 75% an thawk hman lo a, chuvang chuan second instalment cheng vbc. 233.36 a lapse tâk thu a sawi.

MNF sorkar chêtmuan vanga sum lapse chu ZPM sorkar puh a nih daih thu sawiin Duhoma chuan, "A mawhphurtu kan zawn dawn chuan sorkar hmasa an ni. Kum 2022-23 a an tih lapse nen a vaiin cheng vbc. 433.36 an ti lapse a ni," a ti.

Lalduhoma chuan, an sorkar hnuah SASCI sum an dawn ve tawh thu sawiin, "Kum hmasa lama kan dawn zat kan dawng dawn emaw kan ti a, mahse, central-in SASCI atana sum a dah cheng vbc. 80,000 aṭangin cheng vbc. 55,000-ah a tihniam," a ti a, chuvang chuan kum 2024-25 a Mizoram chan tur pawh vbc. 275 a nih thu a sawi.

SASCI sum chu rang taka an bawhzui thu sawiin CM chuan, "Phel sìn a, party worker-te sem tih vel kan ti ve lo. Project pawimawh zual pariat kan thlang a, kan thehlut tawh. March 15, 2024 khan approval kan dawng. Model Code of Conduct tawp veleh kan bawhzui ang. 75% kan zawh veleh a dang kan dil leh ang a, kan thawh ṭhat na nâ nâ chuan min pek belh kan beisei," a ti.

Chief Minister chuan, an sorkar hnuah official-te nen theihtawpin inrenchemna an kalpui bakah, sum hnárte an dap thu sawiin, "Sum dinhmun chhe tak aṭangin GST-ah India ramah pakhatna kan ni. Sorkar hnathawk hlawh a hunah ka pe thei zel rih. Official-te thawhrimna zar a ni. Hmabak erawh a la ko," a ti a; sorkar kum tharah chuan sum dinhmun a ziaawm deuh tawh an beisei thu a sawi.

SASCI-A PROJECT THARTE

☑ District hrang hranga jail sak ṭhat.

☑ 37 MLD Aizawl water treatment plant atan.

☑ Lunglei Water Supply Scheme tihchangtlunna.

☑ Aizawl Water Supply Scheme tihchangtlunna.

☑ District hrang hranga zirtirtu quarters sak.

☑ Industrial Training Institute tihchangtlun.

☑ Sorkar quarters sak belh.

☑ Tuirial Hydel Project thawm ṭhatna.