ZMC-a doctor chhuak tharte thlah

Zoram Medical College (ZMC) chuan nimin khan ZMC Lecture Hall-ah MBBS batch hmasa bera doctor chhuak tharte thlahna, Graduation Day vawi khatna an hmang. MBBS zir zo tawh leh internship pawh zo tawh doctor 95 hnenah certificate hlan a ni.

ZMC Graduation Day hi ZMC director Dr John Zohmingthanga'n a kaihruai a; Health & Family Welfare secretary Esther Lal Ruatkimi khuallian niin, Mizoram University controller of examination Prof. Lalnuntluanga khualzahawm a ni.

Esther Lal Ruatkimi'n ZMC-a MBBS batch hmasa ber (2018) zinga ti ṭha ber Dr Lalrempuii Hmar hnenah Col. VL Ruata Award leh Outstanding Students Award a hlan a; ani bakah hian ti ṭha zual pathum zinga pahnih Dr Vanlalchhuanpuia leh Dr Ruth Lalrinawmi te hnenah Outstanding Students Award a hlan bawk.

Health Secretary chuan, zirlaite chu Pathian ṭih tur leh tum mumal tak nei zel turin a chah a, "Mizoramin kan nghahhlelh in ni a, ruih theih thilah inthiar fihlim ang che u," a ti a; sorkarin a dahna hmun apiangah ṭha taka awm turin a chah.

ZMC-a MBBS batch hmasa berah hian seat awm zat angin mi 100-in admission an ti a, zirlai pakhat hnawhchhuah niin, pahnih an thi a; a tàwp thlenga zirlai awm mi 97 zinga 95-in an zo a ni.

Batch hmasa bera zirlai hlawhtling mi 95-te chu hmeichhia 57 leh mipa 38 an ni a; Mizoram quota-a zir mi 72, all India quota (AIQ) hnuaia lut mi 10 leh Non Resident Indian (NRI) hnuaia zir mi 13 an ni. NRI hnuaiah hian Mizo pathum an awm a, Mizoram mi zir chhuak zawng zawng chu 75 an ni.

National Medical Commission leh MZU hriatpuina hnuaiah ZMC-ah hian medical course 22 a awm a, kum 2018 aṭanga 2023 thlengin zirlai 589 an lut tawh a, mipa 266 leh hmeichhia 589 niin, Mizoram state quota 436, AIQ 66 leh NRI 87 an ni.

ZMC-A MBBS ZOTE

1. Aizawl district - 53

2. Lunglei district - 3

3. Siaha district - 3

4. Champhai district - 5

5. Kolasib district - 3

6. Serchhip district - 2

7. Lawngtlai district - 4

8. Mamit - 1

8. Saitual district - 1

9. Manipur - 5

10. Assam - 3

11. Rajasthan - 3

12. Uttar Pradesh - 3

13. Kerala - 2

14. Arunachal Pradesh - 1

15. Nagaland - 1

16. Bihar - 1

17. Meghalaya - 1