Sorkarin gas man a bithliah thar
Sorkar laipuiin eirawngbawlna gas (LPG) man a tihchhuah thar zûlzuin Mizoram Food, Civil Supplies & Consumer Affairs (FCSCA) department chuan gas man thar a tichhuak. Gas man thar hi May 1, 2024 khan hman ṭan a ni a, domestic leh composite cylinder tih loh bûr dang zawng chu a man a tlahniam.
FCSCA department tarlan danin, Vairengte tih loh hmun dang zawngah domestic cylinder (kg. 14.2) man Rs 955, commercial cylinder (kg. 19) man Rs 2,205.50, XtraTej (kg. 19) man Rs 2,227.50 leh composite (kg. 10) man Rs 688.50 a ni. Vairengteah domestic cylinder Rs 946, commercial cylinder Rs 2,190.50, XtraTeJ Rs 2,212.50 leh composite Rs 678.50 a ni thung.
November 1, 2022-a FCSCA department-in hriattirna a tihchhuah angin, Aizawl Municipal Corporation huam chhung leh district khawpui tinah home delivery kalpui tawh tur a ni a, gas bûr khatah a man pangngai bakah, delivery charge Rs 70 aia tam lo belh tur a ni.
Gas chu agency/distributor kudama hralh a nih chuan a man pangngai aṭangin Rs 33.43 paih tur a ni a, home delivery kalpui thei ngang lo venga point delivery kalpuinaah chuan a man pangngai aṭangin Rs 7.53 belh tur a ni thung.
November 25, 2014-a sorkar thupek tihchhuah tawh angin, LPG distributor-in gas an pekna khuaah, a hlat záwng (kilometer zat) leh pawisa chawi belh ngai zat tarlante hmangin gas man chhût tur a ni a; rate dik tak hmangin distributor-te'n an huam chhungah gas an sem tur a ni tih a ni bawk.