Thli, ruah leh rial thawk vangin chenna in eng emaw zat a chhia

May 2, Ningani tlai leh zana ruahsur, thlipui tleh leh rial tla vangin Mizoram hmun hrang hrangah chenna in eng emaw zat a chhia.

Vantawng editor Liantluanga Renthlei hnen aṭanga thu dawn danin, May 2 tlaia ruahsur leh thlipui tleh avangin Thenzawlah chenna in 28 a chhia a, paruk chu luah zui tlak lohin a chhia a ni.

Thlipui hian Thenzawl Vengthar, Horticulture College panna kawnga mual pakhat chu na takin a nuai a, chenna in pali chu luah zui tlak lohin a tichhe vek a, Vengthara in pakhat a chhe vek bawk.

Thenzawl Vengthar huam chhungah tho hian in dang panga chu thliin tichhiain, a chung rângvâ a lâk vek te, a chung leh a bang ṭhenkhat a tihchhiatte a ni.

Thenzawl Venghluna PWD quarters pakhat, PWD quarters leh Soil & Water Conservation quarters bakah mimal in 11 chu thawm ṭhat ngaiin a chhia a; Thenzawl Vengthlangah chenna in pathum a chhe nual bawk.

Khawzawl district-a Tlangpui leh Sialhâwkah March 2 zana thlipui tleh leh rial tla vangin in eng emaw zat a chhia. Tlangpui khuaah in 55 a chhia a, rialin in chung a den chhiatte a ni hlawm.

Sialhawk khuaah rialin chhungkua 71-te in leh lo a déng chhia. In pathum chu leimin leh lungrem min vang a ni a, in 68 chu rialin in chung a den chhiat a ni. Chên zui ngam loh khawpa chhia, mahni in chhuahsan chhungkaw panga an awm.

Lawngtlai district-ah pawh thli, ruah leh rial thawk vangin chenna in 98 a chhia a, a tam zawk chu thawm ṭhata luah zui leh tlak a ni. In chhiate chu Tuithum­hnarah 69, Lunghauka-ah pariat, Sabualtlangah pakhat a ni. Vaṭhuam­puiah Bangladesh aṭangha ráltlânte chenna in 21 a chhe bawk.