ADB sum hmanga hnathawh endik

Asian Development Bank (ADB) hnuaia Project Readiness Financing (PRF) hmanga Mizoram sorkarin Aizawl Sustainable Urban Transport Project (ASUTP) a kalpui mekte chu May 1-3, 2024 chhung khan ADB Mission Team-in an endik.

ADB Mission Team hi senior transport specialist Shuji Kimura-in a ho a, member pahnih senior project officer Kaushal Kumar Sahu leh staff consultant Alo Bhardwaj ten an ṭawiawm. ASUTP hnuaia hmalaknate an endik bakah, UDPA minister K Sapdanga leh UDPA official-te an kâwm a ni.

Nimin khan UDPA secretary Lalmalsawma Pachuau hoin ṭhutkhawm hnuhnung neih a ni a; ADB Mission Team chuan PRF hmanga hnathawh hrang hrangte a hmuna an endikah sorkar hmalakna lawmawm an ti a, ASUTP a hlawhtlin ngei an beisei thu an sawi.

Aizawl khawpui hmasawnna leh mipui chêt vel awlsamna turin ASUTP hnuaiah hmalak ṭan a ni a; project atan ADB aṭangin Aizawl Urban Transport atan sum ṭhahnem tak hmuh beiseia hmalak mek a ni.

ADB kalphung angin tunah hian hmalak mek a ni a, Aizawla kawng leh inkalpawhna zir chiangtu tur mithiam Mott MacDonald Private Ltd., Noida chu cheng vbc. 32.8-in rawih a ni. Consultant-te nen hian Mizoram sorkarin December 8, 2021 khan inremna an siam a, consultant hian January 18, 2022 khan hna ṭanin Aizawl an ṭhutchilh mek a ni.