Champhai DC-in ráltlân awmna a tlawh; Dan zawm lote tan hmun a awm lo - DC

Champhai bawrhsap James Lalrinchhana chuan nimin khan Mélbûk ram chhung Ṭiau lui kam Uilui kaia Myanmar aṭanga rawn ráltlânte awmna camp a tlawh a, dan zâwm lote tan hmun a awm loh thu a hrilh.

Champhai DC chuan, ráltlân dinhmun chiang zawka hriat tuma tlawh a nih thu sawiin, "Niminah District Committee on Myanmar and Bangladesh Refugees ṭhutkhawm a ni a, ráltlân chungchangah thutlukna pawimawh tak tak siam a ni. Ráltlânte buaipui leh enkawl kawnga inkaihhruaina siamte chu village level committee-te'n ṭha taka an kenkawh bakah, ráltlânte'n an zawm ṭhat a ṭul," a ti.

Mizorama an awm chin tur hriat a nih loh avangin ráltlânte chu India rama an awm chhungin khua leh tuite'n an zawm ṭhin dante ṭha taka zâwm tura chahin DC chuan, "Rálmuang takin awm ang che u. Mahse, ram dan zâwm lote tan hmun a awm lo," a ti a; dan palzûttute lakah khauh taka hmalak zel a nih tur thu a sawi.

Champhai DC chuan, inthununna ṭha tak nena chênho thiam a pawimawh thu sawiin, "Dan loa che ṭhinte donaah thuneitute ṭha takin thawhpui ang che u. Ráltlân zingah a bik takin hmeichhia, naupang leh rualbanlote himna sorkarin a ngai pawimawh," a ti a; anmahni duat taka enkawltute laka lawm nachang hriaa theihtawp chhuaha ṭawiawm zel turin ráltlânte a chah.

Uilui kai refugee camp-ah hian chhungkaw 178 vel an chêng mek a, hriselna, zirna, tui, ei leh in leh pawimawh dangte sawiho nghal a ni.