NHRC palaiin jail hrang hrang a endik

Mihring dikna leh chanvo humhalhtu National Human Rights Commission (NHRC) special rapporteur Akhil Kumar Shukla, IPS (Rtd) chuan April 29, 2024 aṭang khan Mizorama jail hrang hrang a endik a; jail-ah táng thei zat bithliah aia tam táng an awm avangin harsatna tam tak a thlen thu a sawi.

Akhil Kumar Shukla hian jail pali - Aizawla Central Jail, Central Women Jail leh Aizawl District Jail bakah, Lunglei District Jail-te a endik tawh a; jail chhung hmun hrang hrang a enfiah bakah, tángte nen an inkawm ṭhin.

Jail tángte dik taka rorelsak an nih a, an chanvote humhalh a nih theihna turin NHRC chuan hma a la a, an aiawhte chu jail endik turin an tír chhuak ṭhin.

Akhil Kumar Shukla hian April 29 aṭang khan Mizorama jail-te a endik a, Aizawla jail-te a endik hnuah May 2 khan Lunglei District Jail a tlawh leh a, nimin khan Aizawlah a rawn lêt leh a ni.

NHRC Special Rapporteur hian May 1 khan chief secretary Dr Renu Sharma leh Home secretary H Lalengmawia te Chief Secretary pisaah a kâwm a, Mizorama jail-te a endik chungchang a hrilh.

Akhil Kumar Shukla chuan, jail-a táng thei zat bithliah aia tam jail-a táng an awm avangin inthiarna, tui, mutna, ei leh in leh thil dangah harsatna tam tak a thleng tih sawiin, pawi a tih thu a sawi a; thawktu indaih loh vanga mi tlemtêin jail táng mi tam tak ṭha taka an enkawl thei leh mihring dikna chanvo rahbehsakna a awm lo chu lawmawm a tih thu a sawi thung.

Chief secretary Renu Sharma chuan, Mizorama jail-te thawm ṭhat tum a ni a, thawm ṭhatna turin Mizoram sorkarin SASCI hnuaiah ruahmanna an thehluh thu a sawi a ni.