Agency-te'n ram páwna thawk turin mi 700/800 vel an thawn chhuak tawh

Chief minister Lalduhoma chuan, ram páwna thawk tur thawn chhuaktu agency-te'n mi 700/800 vel an thawn chhuah tawh thu leh, mi thawn chhuak tura an inziah luhna dan tlawhchhan chu dan dik lo a nih thu a sawi.

CM Lalduhoma hian nimina CMO conference hall-a press conference a neihnaah zawhna chhángin, "Congress sorkarin The Mizoram Private Placement Agencies (Regulation) Act, 2015 a lo siam kha dan siam theih loh tawp tur angin an lo siam a ni. Mizoram páwna mi thawn chhuah theihna license hi pek theihna dan Mizoram state hian a nei lo hrim hrim," a ti.

Congress sorkarin The Mizoram Private Placement Agencies (Regulation) Act, 2015 an siam chu an tih luih ni loin, an hriat sual vang a nih a rin thu sawiin Lalduhoma chuan, "An siam theih loh dan an lo siam miau mai a, chumi hnuah chuan MNF sorkarin mi tam tak hnenah license a pe ve bawk si," a ti a; sorkar hmasa pahnihte thil lo tih dik loh chu a thenfai hna an thawh mek thu a sawi.

Chief Minister chuan, The Mizoram Private Placement Agencies (Regulation) Act, 2015 chu siamṭhat an tum thu sawiin, "Hei hi keini chuan amend tur kan ti. Keini chuan India ram chhung huap anga dan han siam theihna chu kan nei ang, ama'rawhchu, overseas-a thawn tur chuan protector of immigrants kal tlang a ngai a, chutiang nei tur chuan kan infuih bawk. Tuna dan dik si lo hnuaia license an lo pek hote khan license an neih miau avangin thawn chhuak theiah an inngai lo thei lo a, tunah hian mi 700/800 vel an thawn chhuak tawh a ni," a ti.

CM Lalduhoma chuan, license neitute'n amah an hmuh tawh thu sawiin, "Lo thawn chhuak tawh suh u, thawn chhuah theihna in nei lo kan ti,"a ti a; protector of immigrants hnuaiah license neih tum ve tur leh dan ang thlapin sorkar nena inhriatpawha thil ti turin thuràwn an lo pek thu a sawi.