Health clinic 235 tihtawp tawh ngaihtuah nawn turin ngen

MNF party chuan nimin khan an pisa, Mizo Hnam Runah chhung inkhawm an hmang a, thu sawitu MNF adviser Dr ZR Thiamsanga chuan, ZPM sorkarin health clinic 235 an titawp nia sawiin, ngaihtuah nawn leh turin a ngen.

Dr ZR Thiamsanga chuan, MNF sorkar kal ta chu hun khirh hmachhawn tura ruat a nia sawiin, "Primary healthcare kan ngai pawimawh em em a, sub-centre awm lohna khuaah health clinic 235 dah a ni. Sub-centre 373 chu health and wellness centre-ah upgrade a ni bawk. ZPM sorkarin health clinic zawng zawng a titawp mai hi a pawi hle mai. Ngaihtuah ṭha leh turin kan ngen a ni," a ti.

MNF sorkar kal tain healthcare a ngai pawimawh tih sawiin Dr Thiamsanga chuan, "MNF sorkar hmasain Referral Hospital a din chu Congress sorkar khan medical college turin a upgrade a, MNF sorkar kal ta khan a tihpuitlin hna a thawk a, tunah chuan medical college ropui tak kan nei ta a ni," a ti a; MNF sorkarin healthcare a ngai pawi­mawh avangin NITI Aayog tehnaah state tê zingah Mizoram chu ti ṭha ber a nih tawh thu a sawi.

MNF Adviser chuan Mizoram State Health Care Scheme chu MNF bul ṭan a nih thu sawiin, "Kum 2018 MNF sorkar tìr khan kum tin vbc. 50 dah tumin a kalpui a, natna zawng zawng bill theiha siam a ni. Hripui vangin duh angin kan kalpui thei lo a, ADB aṭangin cheng vbc. 1,000 kan dil ta a ni. June/July chho hian tun sorkar hian an hmang ṭangkai dawn niin a lang a, ZPM sorkar hi an vannei hle," a ti.