'Congress ni lo, MNF ni lo' tih ZPM-in an sorkarpui - Lalnunmawia

Congress party chuan nimin khan Congress Bhavan-ah political session an hmang a; MPCC senior vice president Lalnunmawia Chuaungo chuan, ZPM-in 'Congress ni lo, MNF ni lo' tih an sorkarpui niin a sawi.

Lalnunmawia Chuaungo chuan, kum 2023-a MLA inthlanpuiah 'Congress ni lo, MNF ni lo' tih auhla a làr thu sawiin, "Sorkar kal tawhte kan duhkhawp lohna emaw, kan lungawi lohna ṭawngka kan hre tam hle. ZPM pawhin chu chu an sawi nasa a, an auhla pui 'Congress ni lo, MNF ni lo' tih chu an sorkarpui ta a ni," a ti.

Congress sorkarin thil ṭha tih tam tak an neih thu sawiin Lalnunmawia chuan, "Thawk ṭha pawh kan inti. MNF pawhin thawk ṭha an inti em em. Chutih lai chuan, kan rawngbawlsakte hian eng angin nge min ngaih tih a pawimawh," a ti a; ZPM sorkar kalsual leh tih dik loh vanga sorkar an tum tur a ni lo a, an hma­chhawp hmanga mipui hneha sorkar an tum tur a nih thu a sawi.