Mamitah Mizoram Indigenous Games

Doordarshan Kendra leh Mizoram Indigenous Games Association (MIGA) chuan Broadcasting Infrastructure & Network Development (BIND) hnuaiah nimin khan Mamita Mangkhawngdai Field-ah Mizo infiamna hmanga inelna Mizoram Indigenous Games 2024 (inter branch competition) an buatsaih.

Intihsiaknaah hian Mamit district-a YMA branch hrang hrangte chu Mizo infiamna - insuknawr, insai­hrui­pawh, inbuan, inkawibah leh inkepir hmangin an inel a; nimin tlai khan khârna inkhawm hman niin, lawm­mante sem a ni.

Mizo infiamna hmanga intihsiakna hi Mizo hnam infiamnate vawn him leh chawi lâr zel a nih theihna tura buatsaih a ni a; intihsiaka pakhatna aṭanga pathum­nate'n kumin November thlaa Mizoram pum intihsiaknaah Mamit district ai an awh ang.

Nimina khârna inkhawm chu DDK, Aizawl co-producer VL Ṭhakima'n a kaihruai a; YMA Sub-Headquarters, Mamit president Vanlalchhuanga Chhangte-in thu sawiin, ruihhlo laka fihlim zel turin ṭhalaite a chah a, "Mizo infiamnate hi a hlu em em a, kan chawi nun zel a, kan hnam nihna pho chhuak thei infiamna kûtpui buatsaih a ni hi a hlu hle. Kan hnam a dam zel theih nan kan hnam tih dan kan chawi nun zel hi a ṭul a ni," a ti.