KHAWTHLIR

Thisen pe

Nimin khan KM Higher Secondary School NSS chuan Civil Hospital, Aizawl tan thisen unit 26 an pe a, petute mipa 19 leh hmeichhia pasarih an ni. St. John's Higher Secondary School NSS pawhin Kolasib District Hospital tan thisen unit 35 an pe a, petute mipa 24 leh hmeichhia 11 an ni.

Thilpek hlan

April 19, 2024-a Lok Sabha MP inthlan vote thlâk zawh tâka Lawngtlai khawpui chhunga polling station hrang hranga voter-te a ṭul anga lo puibâwm tura tlawmngaia inpe (volunteer) Don Bosco School, Lawngtlaia Scouts & Guides zirlaite hnena lawmthu sawina thilpek nimin khan Lawngtlai DC conference hall-ah hlan a ni.

DC-in tlawh

Serchhip bawrhsap David Lalthantluanga chuan nimin zing khan May 2, Ningani tlaia ruahsûr leh thlipui tleh vanga Thenzawla chenna in chhiate a hmunah a enfiah. Chhiatna tuar chhungkuate hnenah State Disaster Response Fund aṭangin ṭanpuina pawisa a hlan nghal a ni.

Thiamthil hmasawn dan tur sawiho

Saitual District Skill Development Committee chu nimin khan an chairman Dr Lalngura Tlau, bawrhsap hoin DC conference room-ah an ṭhukhawm a, hmalak zel dan tur leh District Skill Development Plan chungchang an sawiho. Thiamthil tihhmasawnna lama mawhphurhna insem dan turte leh ruahmanna siam dan turte rêl a ni a, hnathawh tawh dan leh hmathlirte sawiho a ni bawk.

Vawk lak luh khap

Lawngtlai DC chuan nimin khan thuchhuah siamin, Mizoram hmun hrang hrangah African Swine Fever a lèn avang leh Lawngtlai khaw chhungah pawh vawk thi a awm nual tawh avangin, an district chhungah district pawn aṭanga vawk lak luh a khap a, "Infected area-a puan tawh aṭangin vawk leh vawksa aṭanga siam lak luh leh thawn chhuah khap a ni," a ti