Lalduhoma'n ZPM-ah mi a lâwm lut, Phubá ngaihtuah loh tur - Duhoma
ZPM Legislature Party (ZLP) leader Lalduhoma chuan nimin khan ZPM pisaah ZPM party zawm tharte a lâwm lut a; thu sawiin, MLA aṭanga báng tura ngenna a tawh avangin phuba lam ngaihtuah lo turin kal khawmte a chah.
Lawm luhna inkhawm hi ZPM president Lalliansawta'n a kaihruai a; Lalduhoma chuan, a bàn theih nan MNF MLA 12-te'n Assembly Speaker an ngen chungchang sawiin, "Tu mah haw loin, tu chungah mah phuba lak duhna i pu lo ang u. He thil thleng hi ZPM tan malsawmna a ni zawk. Hmun hrang hrangah lawm luh tur an awm reng a ni," a ti.
Lalduhoma chuan, a chunga thil thleng avangin an hotute'n politics tui nú a thlen belh an phal lo tih sawiin, "Vanduaithlak tak angin lang mah se, kan ram politics tifim a, reformation thlen tur a ni. He thil avang hian khawngaihtu ka ngah em em a, party mi leh party mi ni lote an rawn léng reng a, chhungkua pawhin kan awm hman meuh lo," a ti a; ṭawngṭai chu an innghahna ber a nih thu a sawi.
ZLP Leader chuan, ZPM lakah mite'n beiseina an nei sáng tih sawiin, "Kan President hian sawhthing chìn sawi mawiin, 'IAS pawh an bàn phahna tur khawp' tiin sawi ta se, party páwn lam chu sawi loh keimahni ngei pawhin kan sawisel ngei ang. Mi President chuan an sawi a, an nuihpui mai mai. Keini chu kan fimkhur a ngai em em a ni," a ti.
Kum 2023 MLA inthlanpuiah ZPM party-in sorkarna an siam ngei tur thu sawiin Lalduhoma chuan, "Rawn lut an awm zel a, páwn lam aṭang pawhin thlàwpna kan dawng ṭha. Heti chunga sorkarna kan siam lo a nih chuan keimahni lam zir loh a ni ang," a ti a; ZPM member-te chu Pathian hre reng chunga ṭha taka thawkho turin a fuih.
Lawm luh zinga mi TBC Lalvengchhunga chuan, "Zoram siamṭha thei tura kan hriat kan rawn pan a ni. Political party-te hi tu mah an chhe lo. PRISM a awm tawh miau lo a, ngaihdan kan siam a, kan ngaihdan kan inzahsak a ni. Kan theih tâwk tlem hle mah se, Mizoram tan theihtawp chhuah turin kan inpe a ni," a ti.
Kum 2019-a Lok Sabha inthlana PRISM candidate TBC Lalvenchhunga chuan, mipuiin beiseina an neihna ber chu ZPM a nih thu sawiin, "Mipui rinna hi ZPM-in kan tibeidawng a nih chuan kan hma lam hunah rin tur an nei tawh lo," a ti a; Zoram siamṭha tura an rin ber a nih avangin a ṭhiante nena ZPM zawm an nih thu a sawi.
Lawm luh zingah hian PRISM hruaitu hlui Zodinsanga leh Eddy Zosangliana Colney-te pawh an tel.
Thu sawi tura sàwm Lalnghing-lova Hmar leh Lalrammawia ten thu an sawi bawk.